Zyra për Informim e Avokatit të Popullit ka konfirmuar se kanë pranuar kërkesën e Institutit Kosovar për Drejtësi ne lidhje me Ligjin për Pagat në Sektorin Publik, ku kërkohet që ky institucion të përcjellet për në Gjykatë Kushtetuese ligjin për pagat, për shkak të shkeljeve të konstatuara nga instituti.
Nga kjo zyre thanë se Avokati i Popullit, sipas mandatit kushtetues dhe ligjor, do te shqyrtoje kërkesën brenda afateve ligjore.
“Institucioni i Avokatit te Popullit ka pranuar kërkesën e OJQ-se “Instituti Kosovar për Drejtësi” ne lidhje me Ligjin Nr.08/L-196 për Pagat në Sektorin Publik. Avokati i Popullit, sipas mandatit kushtetues dhe ligjor, do te shqyrtoje kërkesën brenda afateve ligjore” thuhet në përgjigjen.
Instituti i Kosovës për Drejtësi ka deponuar të premten tek Avokati i Popullit kërkesë për inicimin në Gjykatën Kushtetuese për Ligjin për Paga.
Një gjë e tillë është bërë e ditur nga IKD-ja me anë të një komunikate për media, duke thënë se kanë vërejtur shkelje të të drejtave të njeriut.
“Me qëllim të mbrojtjes së kushtetutshmërisë dhe të drejtave dhe lirive themelore të qytetarëve, reagimi i Avokatit të Popullit në këtë situatë është i domosdoshëm. Përmes kësaj letre, IKD kërkon nga Avokati i Popullit që ta trajtojë këtë çështje dhe në përputhje me kompetencat kushtetuese dhe ligjore të iniciojë Ligjin NR. 08/L-196 për Pagat në Sektorin Publik për vlerësim në Gjykatën Kushtetuese” thuhet në kërkesën e IKD-së.
Shqetësim IKD-ja e ka parë edhe mos-përcaktimin e vlerës monetare të koeficientëve tek nëpunësit e sektorit publik.
“IKD ka gjetur se Ligji cenon sigurinë juridike të nëpunësve të sektorit publik, duke mos përcaktuar vlerën monetare të koeficientëve. Sa i përket uljes së pagave, Ligji ka përcaktuar rregulla adekuate për mbrojtjen e nëpunësve nga ulja e pagave. Por, IKD ka gjetur se Ligji i mbron këto rregulla vetëm për të ardhmen, por se nuk i aplikon për të kaluarën. Kjo pasi Ligji në fjalë nuk ka një zgjidhje adekuate në raport me nëpunësit e sektorit publik të cilët ndikohen negativisht nga ky Ligj”, u tha ndër të tjera, shkruan Ekonomia Online.
IKD, ndër të tjera, ka thënë se ndonëse nuk është përcaktuar vlera monetare e koeficientit, nga fryma e përgjithshme e këtij ligji vërehet një tendencë për ulje të pagave të gjyqtarëve dhe prokurorëve.
