Sarkofagu prej druri, i cili ishte i ekspozuar në Muzeun e Shkencave Natyrore në Hjuston, u kthye në Egjipt nga SHBA pasi autoritetet amerikane përcaktuan se ai ishte vjedhur vite më parë, thanë zyrtarët egjiptianë, transmeton InLajmi.
Ky riatdhesim është pjesë e përpjekjeve të autoriteteve egjiptiane për të ndaluar kontrabandën e pasurive të vjedhura. Në vitin 2021, autoritetet në Kajro arritën të kthenin 5.300 artefakte të vjedhura në Egjipt nga e gjithë bota.
Mostafa Waziri, kreu i Këshillit të Lartë të Antikiteteve, tha se sarkofagu daton nga epoka e sundimtarëve faraonikë nga viti 664 para Krishtit deri në fushatën e Aleksandrit të Madh në 332 para Krishtit.
Ai vuri në dukje se sarkofagu është pothuajse 3 metra i lartë dhe ka një majë të lyer me ngjyra të ndezura dhe se është e mundur që t’i përkiste një prifti të lashtë të quajtur Ankenmath, por një pjesë e mbishkrimit në të është fshirë, raporton AP.
Artifakti u dorëzua simbolikisht në një ceremoni në Kajro nga i ngarkuari me punë i SHBA-së në Egjipt, Daniel Rubinstein. Zyra e Prokurorit të Rrethit të Gjykatës së Qarkut të Manhatanit konfirmoi se sarkofagu ishte vjedhur nga nekropoli Abu Sir, në veri të Kajros dhe ishte kontrabanduar në SHBA nëpërmjet Gjermanisë në vitin 2008./InLajmi/
