Eksperti i Sigurisë, Drizan Shala, vlerëson se kërkesa e kryeministrit Albin Kurti, për shtim të forcave të KFOR-it në Kosovë, nuk përkon me gjendjen reale të sigurisë në vend.
Në emisionin “Magazina” në Radio Dukagjini, Shala ka thënë se vendi ka mekanizmin e sigurisë, Policinë e Kosovës, e cila i ka të gjitha kapacitetet që të përballet me gjitha situatat e mundshme.
“Kërkesa e kryeministrit Kurti për shtim të forcave të KFOR-it, më shumë ka për qëllim të bëjë një presion të shtuar ndaj komandës së KFOR-it. Besoj se komandanti i KFOR-it, i është përgjigjur kërkesës së kryeministrit Kurti, që shtimi i numrit të trupave, nuk varet nga pala shqiptare, por duhet vlerësimi nga mekanizmi i tyre. Dhe kjo sipas vlerësimit të fundit u tha se KFOR-i, ka mjaftueshëm trupa ushtarake që të ofrojë një mjedis të sigurtë për të gjitha komunitetet në Kosovë”, ka thënë Shala.
Ndryshe, kreu i Qeverisë së Kosovës, Albin Kurti, në një intervistë për mediumin gjerman“Die Welt”, ka thënë se shtimi i ushtarëve dhe pajisjeve ushtarake të NATO-s në Kosovë do të ndihmonin në paqe në gjithë Ballkanin Perëndimor.
