Sikurse çdo vit në prag të festave, një numër i madh i bashkatdhetarëve nisen drejt Kosovës për të festuar me të dashurit e tyre në vendlindje, shkruan InLajmi.
Pavarësisht pritjeve të gjata në kufij dhe lodhjes, mërgimtarët prapëseprapë marrin me plot vullnet rrugën për ardhur në Kosovë.
Edhe këtë vit, bashkatdhetarë të shumtë kanë arritur në Kosovë edhe përmes rrugëve tokësore, ku vendkalimet kufitare për gjatë kësaj kohe kanë parë fluks të madh të veturave.
Vetëm gjatë muajit dhjetor, bazuar në të dhënat e zëdhënësit të Policisë së Kosovës Baki Kelanit, dërguar për InLajmin, në të gjitha pikat kufitare të Kosovës kanë hyrë 639.839 persona, duke shtuar se kjo përbën një shifër të përgjithme dhe jo vetëm për bashkatdhetarë.
Në periudhën e njëjtë të vitit 2021 përmes rrugëve tokësore, sipas të dhënave nga Policia e Kosovës, kanë hyrë 733.945 persona, shifër kjo dukshëm më e lartë se e këtij viti që po e lëmë pas.
“Sipas Sistemit të Menaxhuar të Kufirit rezulton se në periudhën kohore 01.12.2022 deri më 29.12.2022 në territorin e Republikës së Kosovës kanë hyrë 639.839 persona, kurse në muajin dhjetor të vitit 2021 kanë hyrë 733.945 persona”.
Nga ana tjetër, Zyra për Informim e Aeroportit Ndërkombëtarë të Prishtinës “Adem Jashari”, në një përgjigje për InLajmin thotë se nga 1 deri më datën 29 dhjetor kanë hyrë në Kosovë rreth 205.500 mërgimtarë, një shifër dukshëm më e madhe se vitin e kaluar, e cila ishte 179.790.
Zëdhënësja e Aeroportit të Prishtinës Valentina Gara, njofton se data 24 dhjetor ka qenë më e ngarkuara sa i përket fluturimeve, derisa bëri të ditur se ky fluks i madh i bashkatdhetarëve ka filluar nga data 19 dhjetor.
“Me datën 19 dhjetor ka filluar të rritet numri i fluturimeve. Ndërsa data 24 dhjetor ishte më e ngarkuar sa i përket fluksit të mërgimtarëve”.
Ndryshe, gjatë ditës së martë ishte bllokuar pika kufitare në Meradare nga serbët e veriut, të cilët vendosen barrikada, e kjo shqetësoi jashtëzakonisht shumë mërgimtarët tanë, që tashmë kishin marrë rrugën drejt kësaj pike kufitare, ndërkohë që zgjidhja e vetme që atyre u mbeti ishte pika kufitare te Dheu i Bardhë. Por, ndryshe nga ditët e tjera këtë të enjte barrikadat në Merdare u larguan nga serbët e veriut, dhe kjo ua lehtësoi udhëtimin në Kosovë bashkatdhetarëve që janë ende rrugës për në Kosovë. /InLajmi/
