Bilall Sherifi nga Nisma Socialdemokrate tha se kryeministri, Albin Kurti paraprakisht e ka ditur që ish-policit serb Dejan Pantiq do t’i ndryshohet masa e sigurisë nga paraburgimi në arrest shtëpiak.
Sherifi tha se tentimi i Kurtit për të hedhur fajin te prokurori dhe gjykatësi ishte i ulët, pasi sipas Sherifit, s’ka asnjë mundësi që kryeministri të mos jetë i informuar.
“Tentimi i kryeministrit Kurti dje për të hedhur fajin te prokurori dhe gjykatësi ishte shumë e ulët, goditje nën brez, sepse nuk ka asnjë mundësi që një kryeministër i vendit të mos jetë i informuar se institucionet e drejtësisë do të marrin një vendim të tillë’’.
Sipas tij, Kurti e ka ditur që do të merret një vendim i tillë për Pantiqin dhe përsëri e sulmoi në mënyrë të paprecedent gjykatësin, tha ai në emisionin “Ditari” në Tëvë1.
“Në politikë jam për dekada të tëra dhe vendimet e tilla paraprakisht diskutohen dhe analizohen me institucionet e vendit. Qyqarllëku për të mos dal dhe marrë përgjegjësi për të thënë ‘po unë kam marrë vendim të bëhet ky lëshim sepse situata ishte pranë shpërthimit’ flet shumë për karakterin populist të kryeministrit Kurti. E ka ditur se do të bëhet një veprim i tillë dhe e sulmoi në mënyrë të paprecedent gjykatësin që mori këtë vendim”, përfundoi Sherifi.
