Pas largimit të barrikadave në Rudare të Zveçanit, njëjtë është vepruar edhe në Lagjen e Boshnjakve.
Aty është duke qëndruar një ekip nga RTV Dukagjini, ku edhe kanë konfirmuar se tashmë është larguar edhe pengesa e fundit.
Barrikada e vendosur në Lagjen e Boshnjakëve, ishte barrikada e parë e vendosur në qytet.
Po ashtu sot është liruar për qarkullim edhe Merdarja, pika kufitare midis Kosovës dhe Serbisë, pas dy ditësh e mbyllur.
Ndryshe, që nga e shtuna e 10 dhjetorit, serbët lokalë kanë ngritur barrikada në shenjë pakënaqësie për arrestimin e një ish-pjesëtari serb të Policisë së Kosovës, Dejan Pantiq, për të cilin, autoritetet në Kosovë thonë se ka organizuar sulmet ndaj zyrave të Komisionit Qendror të Zgjedhjeve në veri.
Ndërkaq më 28 dhjetor, autoritetet në Kosovë ndryshuan masën e sigurisë, nga paraburgimi në arrest shtëpiak për Dejan Pantiq.
Pas kësaj, presidenti i Serbisë, Aleksandër Vuçiq tha se heqja e barrikadave në veri të Kosovës do të nisë mëngjesin e së enjtes.
