Prokuroria Speciale e Kosovës ka njoftuar se në bazë të kërkesës së kësaj prokurorie, Gjykata Themelore në Prishtinë ka vendosur që Dejan Pantiqit t’ia zëvendësojë masën e paraburgimit me arrest shtëpiak për shkak se ky i fundit nuk ishte në gjendje të mirë shëndetësore, përcjell InLajmi.
Në njoftimin e Prokurorisë Speciale thuhet “duke u bazuar në aspektin shëndetësor dhe njëkohësisht aspektin human, Prokuroria i ka propozuar Gjykatës Themelore në Prishtinë, zëvendësimin e masës së paraburgimit për të pandehurin Pantiq, pasi i njëjti ishte në pamundësi t’i gëzoj të drejtat që ju takojnë të paraburgosurve në qendrat e paraburgimit”.
Tutje, nga prokuroria njoftojnë se Dejan Pantiq nuk u dërgua asnjëherë në paraburgim, ani pse ka ekzistuar vendimi për caktim të paraburgimit.
Postimi i plotë nga Prokuroria Speciale:
Prokuroria Speciale e Republikës së Kosovës njofton opinionin publik se në bazë të kërkesës së kësaj prokurorie, më 12.12.2022, Gjykata Themelore në Prishtinë kundër të pandehurit Dejan Pantiq, ka caktuar masën e paraburgimit për veprën penale “Sulm terrorist”.
Edhe pse kundër të pandehurit ka ekzistuar vendim për caktim të paraburgimit, për shkak të rrethanave tashmë të njohura, i njëjti asnjëherë nuk u dërgua në paraburgim ashtu siç kërkohet me ligj.
Pas vizitave të ekipeve mjekësore të Eulex-it, të cilët kanë konstatuar gjendje jo të mirë shëndetësore për të pandehurin, ata kanë rekomanduar trajtim në një qendër spitalore, megjithatë as ky rekomandim nuk u realizua.
Prokuroria Speciale e Republikës së Kosovës, duke u bazuar në aspektin shëndetësor dhe njëkohësisht aspektin human i ka propozuar Gjykatës Themelore në Prishtinë, zëvendësimin e masës së paraburgimit për të pandehurin Pantiq, pasiqë i njëjti ishte në pamundësi t’i gëzoj të drejtat që ju takojnë të paraburgosurve në qendrat e paraburgimit. /InLajmi/
