Greva e mësimdhënësve nga 25 gushti nuk u mbyll, por vetëm u pezullua deri në janar të vitit 2023 me kusht që kërkesat e sindikalistëve të përfillen nga Qeveria e Kosovës në kuadër të Ligjit të Pagave, shkruan InLajmi.
Gjatë kësaj periudhe njëmujore ishin nxënësit ata të cilët e pësuan, pasi mbi 580 mijë orë mësimore u humbën, kurse kompensimin e këtyre orëve e kërkoi me ngulm Ministria e Arsimit, por ishte SBASHK-u dhe Këshilli i Prindërve të Kosovës, të cilët e kundërshtuan fuqishëm vendimin.
Vendimin e Ministrisë së Arsimit për kompensimin e orëve të humbura jo të gjitha komunat e kanë respektuar, por ka të atilla, ani pse të pakta në numër, që kanë mbajtur mësim të shtunave.
Nëse është respektuar ose jo vendimi për kompensimin e orëve të humbura, Ministria e Arsimit nuk ka dhënë përgjigje konkrete, derisa bëri të ditur se procesi mësimor është realizuar sipas kalendarit të rishikuar të vitit shkollor.
“Sa i përket kompensimit të orëve, ky proces është realizuar ashtu siç e parasheh kalendari i rishikuar i vitit shkollor në datat që është paraparë të realizohet”.
Zyrtarë nga Ministria e Arsimit në një përgjigje për InLajmin theksojnë se orët e humbura duhet të kompensohen dhe përgjegjësia për zbatimin e vendimit u takon komunave.
“Bazuar në të dhënat e Inspektoratit të arsimit, në javët e fundit pjesëmarrja e nxënësve në mësim ka qenë më e madhe së në fillim. Kalendari shkollor duhet të respektohet, kjo është në interesin e vet fëmijëve. Humbjet për shkak të grevës kanë qenë shumë të mëdha andaj duhet të kompensohen. Është përgjegjësi e komunave që të sigurohen për mbarëvajtjen e procesit mësimor dhe të dërgojnë raporte të rregullta sa i përket mbajtjes ose mosmbajtjes së mësimit”.
Edhe pse Ministrisë së Arsimit nuk iu respektua vendimi për kompensimin e orëve, ajo gjeti një mënyrë më praktike, duke shkurtuar kështu pushimin dimëror nga 2 javë në 5 ditë.
Ministria e Arsimit ka dalë me vendim për kohëzgjatjen e pushimit dimëror në 5 ditë, por nuk ka dhënë arsye se pse është bërë ky reduktim i pushimit, ndërkohë që burimet e InLajmit bëjnë të ditur se ky shkurtim i pushimit dimëror vjen si pasojë e grevës së mbajtur.
“Kalendari i rishikuar shkollor parasheh që pushimi dimëror për të gjitha nivelet e arsimit parauniversitar fillon më datë 30.01.2023 kurse mbaron me 03.02.2023. Po i njëjti kalendar, parasheh që gjysmëvjetori i parë për të gjitha nivelet e arsimit parauniversitar përfundon më datë 27.01.2022 ndërkaq, gjysmëvjetori i 2-të fillon më datë 06.02.2023”. thuhet në përgjigjen e ministrisë për InLajmin.
Ndryshe, kreu i SBASHK-ut Rrahman Jasharaj ka paralajmëruar se mund të ketë grevë edhe në janar 2023, nëse kërkesat e tyre të lartëpërmendura nuk përfillen. Shqipe Vishaj /InLajmi/
