Bashkimi Evropian ka dënuar sulmet e fundit ndaj Policisë së Kosovës, KFOR-it dhe EULEX-it dhe ka bërë thirrje për depërshkallëzim të menjëhershëm të situatës në veri.
BE-ja thekson se situata në veri të Kosovës është ende e tensionuar dhe se “duhet respektuar sundimi i ligjit e nuk do të tolerohet asnjë formë e dhunës”.
“Ne dënojmë fuqishëm sulmet e fundit ndaj EULEX-it, KFOR-it dhe Policisë së Kosovës. Prandaj bëjmë thirrje për vetëpërmbajtje maksimale dhe veprime të menjëhershme për depërshkallëzimin e situatës. Kjo përfshin shmangien nga aktet provokuese, kërcënimet ose frikësimet. Sundimi i ligjit duhet të respektohet dhe asnjë formë dhune nuk do të tolerohet”, thuhet në përgjigjen e BE-së për Reporteri.net.
BE-ja bën thirrje që tensionet të ulen dhe të rivendoset menjëherë liria e lëvizjes.
Nga palët kërkohet të angazhohen dhe të kontribuojnë në një zgjidhje politike në mënyrë që tensionet të ulen.
“Ne presim që Kosova dhe Serbia të kthehen në nxitjen e një mjedisi të favorshëm për pajtim, stabilitet rajonal dhe bashkëpunim për të mirën e qytetarëve të tyre, kjo përfshin edhe mbrojtjen e popullatës serbe në veri të Kosovës.
BE u bën thirrje të 2-ja palëve që të zbatojnë plotësisht të gjitha detyrimet e tyre të dialogut. Liria e plotë dhe e papenguar e lëvizjes së të gjithë qytetarëve dhe komuniteteve, duke përfshirë udhëheqësit fetarë, duhet të rivendoset dhe garantohet menjëherë dhe pa kushte”, thuhet tutje në përgjigjen e BE-së.
Kryeministri i Kosovës, Albin Kurti edhe dje e ka përsëritur se heqja e barrikadave në veri është vetëm çështje ditësh.
“Nuk mund të zgjasë me muaj. As nuk mundet për javë të tëra. Mund të zgjasë vetëm me ditë”, ka thënë Kurti.
