Politologu, Dritëro Arifi, ka thënë se nënkryetari i Listës Serbe, Milan Radoiçiq dhe biznesmeni i lidhur me këtë parti, Zvonko Veselinoviq pavarësisht që supozohet që janë të ndërlidhur me grupet terroriste që veprojnë në veri, këtë duhet ta dëshmojnë institucionet në mënyrë ligjore.
I ftuar në emisionin “Këndi i Debatit”, Arifi tha se për këtë rast do të duhej që Kosova të ngre padi dhe të hapet rasti kundër tyre.
“Nuk kanë ende gjykim dmth ata supozohet se mund të jenë të ndërlidhur me grupet terroriste dhe kriminale, por problemi është që ne duhet ta bëjmë në mënyrë ligjore, të ngremë padi, prokuroria t’i padisë, të hapet rasti. Duhet me punu në mënyrë ligjore nuk guxojmë të themi që këta janë kriminel sepse ne duhet të bazohemi në ligj”, tha Arifi.
Tutje sipas Arifit, Kosova ende nuk është tërësisht e pavarur e sidomos në veri të vendit, kjo sepse sipas tij, Kosova tërë kohën po kërkon ndihmë nga KFOR-i për të intervenuar atje, shkruan Tëvë1
“Veriu është problem politik po vërehet që shumë vështirë ka me u zgjidh nëse provokimet rriten, KFOR-i nuk mundet njëherë me intervenu sepse ai nuk është për çështje të brendshme. KFOR-i, është vetëm në bazë të Rezolutës 1244 e cila është e fjetur ne krejt e dimë por KFOR-i, është bash për këtë pikë, kjo na dëshmon edhe një pikë që Kosova nuk është bash e pavarur sidomos në veri. Kjo po dëshmon sepse ne po e kërkojmë tërë kohën ndihmën e KFOR-it, që ne të mos intervenojmë që normalisht të mos ketë tensione teknike shumë e logjikshme”, shtoi ai.
