Problemet politike me Serbinë, Kosova i ka ende të pazgjidhura, por kur vjen puna tek shkëmbimi tregtar, ndryshojnë gjërat, shkruan InLajmi.
E këtij ndryshimi ‘hajrin” siç duket po ia sheh shteti serb, kjo pasi importi i produkteve të këtij vendi nga viti në vit shkon duke u rritur.
Vetëm në periudhën janar-tetor të këtij viti importi i produkteve serbe u rrit për 2 %, më shumë krahasuar me periudhën e njëjtë të vitit të kaluar, e kjo u bë e ditur nga ASK në një përgjigje me shkrim për InLajmin.
“Derisa rritja e importit këtë vit është 2%, krahasur me vitin paraprak, vlera monetare e import për periudhën janar-tetor arrin në 310.069.546. euro, kurse gjatë vitit 2021, për periudhën e cekur, vlera e importit të mallrave serbe ishte 248.382.538 euro”, bëhet e ditur nga Agjencia e Statistikave të Kosovës për InLajmin.
Gazeta InLajmi ka provuar të marrë informata zyrtare në lidhje me këtë çështje nga Ministria e Tregtisë por nuk kemi arritur ti sigurojmë të dhënat pavarësisht përpjekjeve dhe insistimit 2 javor të redaksisë së InLajmit.
Kujtojmë se Ramush Haradinaj gjatë kohës sa kishte qenë kryeministër i Republikës së Kosovës kishte vendosur masën e taksës 100% ndaj produkteve të Serbisë. Kjo kishte bërë që importi i Kosovës nga Serbia të shënonte një rënie drastike, pra vetëm 6 milion euro gjatë vitit 2019.
Po në të njëjtin vit, 2019 Ministria e Tregtisë dhe Industrisë nxori Udhëzimin administrativ që obligon operatorët ekonomik që ta vendosin flamurin e origjinës së produktit nëpër dyqane, në mënyrë që konsumatorët të njoftohen me origjinën e mallrave që blejnë.
Ndërsa në lidhje me rritjen e importit gjatë vitit që po lëmë pas për Gazetën InLajmi foli edhe ish-ministri i Industrisë Endrit Shala i cili theksoi se secili ministër dhe secili sektor duhet ta aplikoj atë ligj për atë kohë sa është në fuqi.
“Ky udhëzim nuk ka pas politikë as kundër Serbisë dhe as kundër ndonjë shteti tjetër, por qytetari ta dijë se çfarë produkti po e konsumon”, shtoi tutje Shala për Gazetën InLajmi.
Ndërkohë, njohësi i ekonomisë Safet Gerxhaliu, për Gazetën InLajmi, tha se është paradoksale të kemi tensione politike me Serbinë e në anën tjetër të kemi rritjen e importit të produkteve nga ky shtet.
Ndryshe, Gërxhaliu thekson se derisa në Kosovë nuk ka stabilitet politik nuk do të ketë zhvillim ekonomik.
Sipas tij, ekonomia po pëson për shkak të agjendës politike e cila po e “mbytë” ekonomin e vendit.
“Derisa nuk do të ketë stabilitet politik nuk do të ketë zhvillimi ekonomik. Në këtë drejtim definitvisht falë agjendës politike po ngulfatet ekonomia dhe këtë ngufatje ekonomike është duke e përdorur jo vetëm Serbia por edhe vendet e tjera të rajonit”, tha Gërxhali për InLajmin.
Gërxhaliu thekson gjithashtu se shtimi i importit nga Serbia në Kosovë shpërfaqë diplomacinë ekonomike të fuqishme të shtetit serb.
“Është e vërtet paradoksale ti kemi këto tensione politike dhe të kemi këtë rritje të importit nga Serbia por kjo e dëshmon së sa diplomaci të fuqishme ekonomike ka Serbia sa kanë partner strategjik në Kosovë”, deklaroi Gërxhaliu për InLajmin.
Më tej Gerxhaliu foli edhe për masat që duhet ti ndërmarrë Qeveria e Kosovës në këtë drejtim, ndërsa theksoi se ajo çka është më shqetësuese është fakti që shumë pak bëhet për të promovuar prodhimet vendore dhe mungon mbështetja nga qeveria për sektorin privat. Libona Gegaj /InLajmi/
