Në pikat e kalimit kufitar të Kosovës me Serbinë edhe këtë të shtunë po vazhdon të ketë fluks të madh të automjeteve dhe pritje të gjata deri në 2 orë e gjysmë të bashkatdhetarëve tanë, që po vijnë nga vendet e Evropës Perëndimore për të kaluar festat e fundvitit në Kosovë.
Kolona të gjata të veturave, sipas Qendrës Kombëtare për Menaxhimin Kufitar dhe pritje më të gjata ka në vendkalimet kufitare me Serbinë në Merdar dhe të Dheu i Bardhë.
Në vendkalimin kufitar në Merdar, bashkatdhetarët po presin deri në dy orë e 40 minuta për të hyrë, kurse kolona e automjeteve arrin deri në 1.1 km .
Ndërsa, në vendkalimin kufitar te Dheu i Bardhë, për të hyrë në Kosovë po pritet deri në dy orë. Kolonat e automjeteve në këtë vendkalim kufitar arrijnë deri në një km.
Edhe në vendkalimin në Muçibabë bashkatdhetarët po presin më shumë se një orë për të hyrë në Kosovë, kurse në Mutivodë deri në 30 minuta.
Vendkalimet kufitare me Serbinë në veri të vendit, në Jarinjë dhe Bërnjak, po vazhdojnë të qëndrojnë të mbyllura, si pasojë e barrikadave të vendosura nga serbët në rrugët magjistrale që shpien në këto 2 pika kufitare, raporton Telegrafi.
Në vendkalimet e tjera kufitare të Kosovës me vendet fqinje nuk raportohet për kolona, pasi pritjet për të hyrë dhe për të dalë nga Kosova janë 03-05 minuta.