Kryetari i Partisë Demokratike të Kosovës, Memli Krasniqi, ka takuar të premten Këshillin Politik të PDK-së me të cilin kanë diskutuar për gjendjen në veri si dhe për temat të brendshme të partisë së tyre, përcjell InLajmi.
Krasniqi tha se injorimi që Qeveria i ka bërë situatës së fundit në veri po rrezikon valë të re të largimit të shqiptarëve dhe në të njëjtën kohë i ka bërë thirrje Qeverisë të mos të dorëzohet para barrikadave të grupeve kriminale të kontrolluara nga Serbia.
Ai tha se me Këshillin Politik kanë diskutuar edhe sa i përket pranimit me të drejta të plota në Aleancën e Liberalëve dhe Demokratëve të Evropës (ALDE).
Gjithashtu në këtë u fol edhe sa i përket ecurisë së zgjedhjeve në Rininë Demokratike të Kosovës ku do të shënohet sukses i jashtëzakoshëm për demokracinë dhe fuqizimin e partisë, shtoi Krasniqi.
Postimi i plotë i tij:
Sot kam takuar Këshillin Politik të PDK-së, me të cilin kemi diskutuar në lidhje me zhvillimet e fundit në Kosovë. Bashkë me Koordinatorin, Akademik Arsim Bajrami, kemi shprehur shqetësimin e madh me realitetin e ri i cili po tentohet të krijohet në pjesën veriore të Kosovës.
Injorimi që Qeveria ia ka bërë kësaj situate vetëm sa e ka vështirësuar konsolidimin e sovranitetit të plotë në atë pjesë të Kosovës dhe po rrezikon një valë të re të largimit të shqiptarëve. Edhe një herë, i bëjmë thirrje Qeverisë që mos të dorëzohet para barrikadave të grupeve kriminale të kontrolluara nga Serbia. Zbatimi i ligjshmërisë në tërë territorin e Republikës së Kosovës nuk kërkon kompromis, por lidership shtetëror.
Me Këshillin Politik kemi diskutuar edhe për pranimin me të drejta të plota në Aleancën e Liberalëve dhe Demokratëve të Evropës (ALDE). Pranimi në ALDE vjen si konfirmim i përbrendësimit të vlerave evropiane dhe njohjes së reformave thelbësore që PDK ka bërë gjatë këtij viti.
Në një takim të ndarë kam takuar edhe Kryetarët e Degëve të PDK-së, me të cilët diskutuam për zhvillimet politike, projektet komunale dhe, me theks të veçantë, diskriminimin që Qeveria po u bën komunave që udhëhiqen nga PDK.
Me Kryetarët e Degëve folëm edhe për ecurinë e zgjedhjeve në Rininë Demokratike të Kosovës, të cilat, këtë herë, do të shënojnë një sukses të jashtëzakonshëm për demokracinë dhe fuqizimin e partisë./InLajmi/
