Kuadri mjekësor, tash e sa vite po vazhdon të ikë nga institucionet publike apo duke u larguar nga vendi dhe duke kërkuar punë në shtete të ndryshme të Evropës, shkruan InLajmi.
Kushtet e punës, politikat shëndetësore e pagat e ulëta janë disa nga arsyet e ikjes së kuadrit mjekësor nga Kosova.
E këto largime lirishtë mund të themi se janë shndërruar edhe në “trend”, pasi jo rrallë shohim postime nga më të ndryshme lidhur me largimin e stafit shëndetësor nga Kosova për të migruar në vendet e treta.
Gjatë vitit 2022, 205 mjek kanë plotësuar dokumentacionin për punësim në shtete e BE-së thane nga Oda e Mjekëve të Kosovës në një përgjigje me shkrim për Gazetën InLajmi.
“Duke pasur parasysh se shumica dërmuese, apo 90% prej tyre, janë mjek të sapo diplomuar, pra mjek të përgjithshëm, mungesa e tyre do ndjehet në sektorin e mjekësisë primare pra ne Qendrat e Mjekësisë Familjare” thuhet në përgjigjen me shkrim nga Oda e Mjekëve të Kosovës.
Gjithashtu zyrtarët nga Oda e Mjekëve, bëjnë të ditur se viti i ardhshëm pritet që largimi i mjekëve nga Kosova të jetë me trendin e njëjtë. Megjithatë zyrtarët nga Oda e Mjekëve, shpresojnë që “ikja” e mjekëve do të ndalet me hyrjen në fuqi të Ligjit të Pagave.
Në lidhje me largimin e stafit mjekësor nga Kosova për InLajmin, nga Ministria e Shëndetësisë nuk kanë dhënë shifra se sa mjekë i kanë braktisur institucionet shëndetësore, por kanë dhënë detaje rreth punësimeve të reja të mjekëve, krejt diçka tjetër nga ajo që ne kemi kërkuar përgjigje rreth fenomenit të ”ikjes” së mjekëve nga Kosova.
“Qeveria ka buxhetuar punësimin e profesionistëve të rinj shëndetësor, ku për kujdesin parësor shëndetësor janë aprovuar 300 pozita të reja, ndërsa për kujdesin dytësor dhe tretësor shëndetësor janë aprovuar 100 pozita. Ku angazhimi i tyre do të bëhet në përputhje me ligjin dhe duke respektuar konkurset nga institucionet shëndetësorë”, thuhet në përgjigjen me shkrim nga Ministria e Shëndetësisë për Gazetën InLajmi.
E në lidhje me këtë trend mjaft të shqetësuar janë shprehur përfaqësues të partive opozitare në vend.
Ish-ministri i Ministrisë së Shëndetësisë, Armend Zemaj, në vazhdimësi ka ngritur zërin për situatën e rëndë në sektorin e shëndetësisë, e gjithashtu ka shprehur shqetësime për “ikjen” e mjekëve dhe personelit tjetër shëndetësor, e tash së fundi ka vazhduar me kritika edhe për mos emërimin e ministrit të shëndetësisë edhe 3 muaj pas dorëheqjes së ish-ministrit Rifat Latifaj.
Gjendja në sektorin e shëndetësisë është shqetësuese, por “ikja” e mjekëve dhe personelit tjetër shëndetësor shton edhe më shumë shqetësimet se me trendin aktual të largimit të mjekëve Kosova shumë shpejt mund të mbes pa staf mjekësor.
Këtë shqetësim e shpreh Zemaj, ndërsa kujton se më shumë se 300 mjekë kanë lëshuar Kosovën.
“Kemi më shumë se 300 mjekë që kanë ikur në këto 2 vite. Vetëm 5% e buxhetit për investime kapitale është shfrytëzuar në shëndetësi”, tha Zemaj këtë të enjte në një konferencë për media.
Ndërsa Shemsedin Dreshaj nga Aleanca për Ardhmërinë e Kosovës për InLajmin tregoi se ata si parti kanë të dhëna se janë 196 mjekë të cilët kanë lëshuar Kosovës gjatë vitit që po lemë pas.Libona Gegaj /InLajmi/
