Projektligji për Pagat në Sektorin Publik dhe në Projektligjin për Zyrtarët Publik do të shqyrtohen sot në seancën e Kuvendit të Kosovës, me procedura të përshpejtuara. Kështu kanë votuar deputetët e shumicës parlamentare, ndonëse këtë formë e kundërshtuan deputetët opozitarë.
Qeveria e Kosovës ditë më parë i ka dërguar Kuvendit të Kosovës propozimet për Amendamentet në Projektligjin për Pagat në Sektorin Publik dhe në Projektligjin për Zyrtarët Publik.
Demokracia.com ka siguruar amendamentet e Projektligjit për Pagat në Sektorin Publik dhe në Projektligjit për Zyrtarët Publik. Këto amendamente i janë dërguar Kuvendit pa kaluar në mbledhje të Qeverisë së Kosovës.
Të enjten e javës së kaluar, Kuvendi thirri seancë të jashtëzakonshme me vetëm dy pika të rendit të ditës, Projektligjin për Zyrtarët Publik dhe Projektligjin për Pagat me shmangie nga afatet procedurale.
Portali kishte publikuar vendimin e Kuvendit për seancë të jashtëzakonshme, me kërkesë të partisë në pushtet, LVV-së.
Ndryshe, në seancën e 9 dhjetorit kur janë miratuar në parim këto projektligje është vendosur që trajtimi i tyre të bëhet në procedurë të rregullt.
Pozitë e opozitë kanë qenë pro projektligjit për pagat, megjithatë partitë opozitare kanë kërkuar që të bëhen ndryshime në mes 2 leximeve. Të njëjtit kanë pasur kritika për rangimet dhe përcaktimet e koeficienteve.
Sjellja e këtyre 2 projektligjeve në Kuvend nuk do t`ia mundësonte deputetëve që të shtojnë amendamente të reja për këto dy projektligje të propozuara nga Qeveria.
Më poshtë ju sjell propozimet e reja për Amendamentet në Projektligjin për Pagat në Sektorin Publik dhe Projektligjin për Zyrtarët Publik.
