Para pandemisë, Hong-Kongu priste rreth 56 milionë turistë në vit. Tani destinacioni popullor po ndërmerr hapa të rëndësishëm për të rikthyer turistët pas më shumë se 2 vjetësh rregullash dhe kufizimesh të rrepta udhëtimi.
Vetëm disa ditë pas heqjes së karantinës së detyrueshme në hotele, Hong-Kongu ka konfirmuar planet për të dhënë 500 mijë bileta ajrore falas për të nxitur turizmin.
Lëvizja, e cila u prezantuar fillimisht 2 vjet më parë, u konfirmua nga një zëdhënës i Autoritetit të Aeroportit të Hong-Kongut, i cili ka thënë se 500 mijë bileta, me vlerë rreth 254.8 milionë dollarë, do të shkojnë për turistët nga e gjithë bota.
“Që në vitin 2020, Autoriteti i Aeroportit të Hong-Kongut ka para-blerë rreth 500 mijë bileta ajrore nga linjat ajrore vendase si pjesë e një pakete ndihme për të mbështetur industrinë e aviacionit”, shtoi zëdhënësi.
Detaje të mëtejshme do të bëhen të ditura kur të arrihen marrëveshjet përkatëse me kompanitë ajrore, shkruan MeteoBallkan.
“Autoritetet e aeroportit do të finalizojnë marrëveshjen me linjat ajrore. Kur qeveria të njoftojë se do të heqë të gjitha kufizimet e koronavirusit për pasagjerët që vijnë, ne do të nisim fushata reklamuese për biletat falas”, ka deklaruar Dane Cheng, drejtor ekzekutiv për turizëm në Hong-Kong.
