Policia e Kosovës u ka bërë apel qytetarëve për kujdes të shtuar gjatë ngasjes në komunikacion, për shkak të krijimit të ngricave dhe akullit në rrugë, përcjell InLajmi.
Nga policia thonë se për shkak të rënies së temperaturave nëpër rrugë janë krijuar shtresa të akullit, që rrezikojnë vozitësit në trafik.
Në fund, Policia e Kosovës ka dhënë disa këshilla se si të veprohet në rastet kur temperaturat janë të ulëta dhe rrugët bëhen më të vështira për qarkullim.
Njoftimi i plotë nga Policia e Kosovës:
Kujdes të shtuar gjatë ngasjes në rrugë me ngrica e akull!
Pas reshjeve të shiut në shumë segmente rrugore ka rrjedhje të ujit, ku me rënien e temperaturave në këto lokacione krijohen shtresa të akullit që rrezikojnë seriozisht pjesëmarrësit në trafik, përveç kësaj kujdes i shtuar duhet treguar edhe në ura dhe në rrugë rurale e malore ku mund të krijohen ngrica dhe shtresa të akullit.
Policia e Kosovës bazuar në kushtet meteorologjike apelon për kujdes të shtuar në trafik:
- Përqendrohuni maksimalisht gjatë drejtimit të mjetit!
- Mbani distancën në mes mjeteve!
- Përdorni pajisjet dimërore!
- Përdorni rripin e sigurisë!
- Respektoni kufizimet e shpejtësisë konform kushteve atmosferike të krijuara!
- Mos përdorni telefoni mobil gjatë ngasjes!
- Mos kryeni parakalime të ndaluara apo mos bëni manovra me mjet në rrugë!
- Në rast të ndonjë ngadalësimi në qarkullim apo krijim të kolonave prisni në shiritin tuaj dhe në asnjë mënyrë mos provoni të bëni tejkalime të rrezikshme! /InLajmi/
