Profesori universitar, Dorajet Imeri duke folur për hapat e fundit drejt heqjes së vizave për qytetarët e Kosovës, tha se ky është një sukses i përbashkët.
Imeri në emisionin “Ditari” në tëvë1 u shpreh kështu, duke iu referuar deklarimit të zëvendëskryeministrit Besnik Bislimi, i cili tha se sukseset e Qeverisë veçanërisht në sundim të ligjit, ishin faktorë kryesorë në avancimin e këtij procesi që sipas tij, ishte bllokuar për vite me rradhë.
Por që Imeri theksoi se, luftimi i krimit dhe korrupsionit varet nga sistemi i drejtësisë e jo nga Qeveria.
“Të themi që nuk ka duhemi të jemi të padrejtë sepse sigurisht që luftimi i krimit të organizuar e korrupsionit është një nga kriteret themelore që ka sot Bashkimi Evropian, por luftimi i krimit dhe korrupsionit varet nga sistemi i drejtësisë, e jo nga Qeveria. Dhe prandaj nisur nga kjo sigurisht që nuk mundemi kur kemi dështime të themi që këto i përkasin sistemit të drejtësisë, e kur kemi suksese janë sukseset tona. Suksesi është i përbashkët Kosova ka plotësuar kriteret para disa vitesh, pra edhe kur kemi pasë qeveritë e tjera në pushtet, por që Kosova vuan nga krimi dhe korrupsioni kjo s’ka diskutim”, tha ai.
Tutje ai tha se qeveritë do t’i fërkojnë duart se kush ka bërë më shumë e kush më pak, por sipas tij, ajo çka është e rëndësishme është që Kosovën e presin shumë sfida të tjera në vijim.
“Prandaj çka dua të them është se ky proces fatmirësisht është i përmbyllur tashmë. Qeveritë do t’i fërkojnë duart se kush ka bërë më shumë e kush më pak, por çka është e rëndësishme është që Kosovën e presin shumë sfida të tjera në vijim”, 6 tha ai.
Ambasadorët e BE-së, sot kanë miratuar deklaratën për liberalizimin e vizave ka njoftuar presidenca çeke.
Me këtë votim mbyllen procedurat teknike për liberalizimin e vizave. Vendimi përfundimtar pritet të merret nga Këshilli i ministrave të Brendshëm të BE-së.
Vendimi për heqjen e vizave për kosovarët pritet të hyjë në fuqi më së largu më një janar të vitit 2024.
