Kryesuesi i Këshillit Gjyqësor të Kosovës, Albert Zogaj ka theksuar gjatë ditës se nuk janë tërhequr nga kundërshtimi i ligjit të pagave, që do t’ua ulte ndjeshëm pagat gjyqtarëve dhe prokurorëve. Zogaj në një organizim të KGJK-së, ka folur edhe për punën në Gjykatën Themelore të Mitrovicës. Ai ka theksuar se deri më tani i kanë dërguar disa gjyqtar në Mitrovicë, përderisa janë duke e hartuar një plan veprimi për vitin 2023
Prej më shumë se një muaji, puna në Gjykatën Themelore të Mitrovicës Veriore nuk po vazhdon normalisht. Dorëheqja e gjyqtarëve serbë, ka bërë që shumë seanca të dështojnë.
Kryesuesi i Këshillit Gjyqësor të Kosovës, Albert Zogaj, ka treguar se janë duke e hartuar një plan veprimi për punën e kësaj gjykate në vitin 2023.
“Kemi transferuar disa gjyqtarë në Gjykatën Themelore në Mitrovicë, një nga Istogu, 2 nga dega në Vushtrri dhe shumë shërbime të tjera administrative të Gjykatës po suportohen nga Këshilli Gjyqësor dhe nga Gjykata Supreme. Ne jemi shumë optimist që edhe në fillim të muajit shkurt, edhe gjyqtarët të cilët janë aktualisht në programin fillestar në Akademinë e Drejtësisë do të kthehen në Gjykatë, pra do të dalim nga situata urgjente”, ka theksuar Albert Zogaj, Kryesues i KGJK-së.
Zogaj, në këtë organizim të KGJK-së, ka folur edhe për funksionimin e gjyqësorit në përgjithësi.
Ai ka theksuar se vazhdojnë ta kundërshtojnë qeverinë e Kosovës, që përmes ligjit të ri të pagave, po synon uljen e pagave për gjykatës dhe prokuror, shkruan Dukagjini.
“Ne tashmë kemi një vendim të Gjykatës, të cilin nuk e diskutojmë dhe të gjithë besoj se duhet me e respektua. Vendimi i Gjykatës Kushtetuese për statusin e gjyqtarit dhe pagat është i qartë. Unë besoj se është krijua edhe opinioni publik se cili duhet të jetë statusi i gjyqtarit, pagat dhe garancionet dhe cilat duhet të jenë sjelljet e qeverisë konfirmo këtij diskutimi”, ka shtuar Albert Zogaj, Kryesues i KGJK-së.
