Në komisionin kuvendar për siguri Ministri i Mbrojtjes, Armend Mehaj deklaroi se Serbisë nuk i besohet asnjëherë dhe se Kosova është e përgatitur për ta mbrojtur vendin, raporton InLajmi.
“Ne jemi të përgatitur, jemi të gatshëm me mbrojt vendin në çdo kohë, kudo që kërkohet”, deklaroi Mehaj.
Mehaj tha se Ushtria e Kosovës ka ngritje të kapaciteteve viteve të fundit dhe se se gjatë vitit 2022 janë rekrutuar 840 ushtarë të rinj, ndërsa gjatë këtyre muajve në total janë rekrutuar 1,230 ushtarë që është dyfishi i vitit 2020 dhe 2019.
“Gjatë këtij viti janë trajnuar rreth 2.047 ushtarakë jashtë vendit. Krahas kësaj është investuar edhe ngritjen e kapaciteteve operacionale me blerjen e pajisjeve ushtarake”, shtoi ai.
Tutje ministri i mbrojtjes deklaroi se buxheti i investuar në këtë vit tejkalon vitin 2021 me 84%, vitin 2020 me 99% dhe vitin 2019 më 98%. /InLajmi/
