Kryeministri i Kosovës, Albin Kurti, në fjalimin e tij në Konferencën e 6-të të Ambasadorëve në Prishtinë, ka deklaruar se Serbia nuk mund ta tradhtojë lehtë Rusinë sa i përket marrëdhënieve të ngushta të këtyre 2 vendeve.
Sipas tij, kjo gjë mund të ndodhë vetëm me një transformim rrënjësor të këtij vendi.
“Serbia nuk mund ta tradhtojë lehtë Rusinë pa pësuar një transformim rrënjësor, sepse ajo e sheh veten si projekt të pushtimit sllav në vazhdimësi. Këto dy gjëra duhet t’u themi me kujdes dhe durim perëndimorëve. Mjafton t’u tregojmë se ekstremet e tyre janë larg Kosovës. Duhet t’u themi se Jugosllavia e atëhershme si platformë për Serbi të madhe ndërtohej i tëri mbi dhunimin e shqiptarëve, për çfarë ka shifra, artikuj e libra”, ka thënë Kurti.
Duke përdorur figura stilistike ai tha se Serbia nuk mjaftohet me atë që i ofron Perëndimi, pasi e mendon veten si bijë të Rusisë.
“’Perëndia serbe’, nuk është e mjaftuar me sakrificën e pjesshme që ia ofroi perëndimi demokratik, sepse e mendon veten bijë të ‘Perëndisë ruse’”, është shprehur ai.
Kurti më tej tha se perëndimorët që janë aleatë, partnerë e miq që jodoemos e dinë vendimin e Gjykatës Ndërkombëtare të Drejtësisë për pavarësinë e Kosovës, shkruan Gazeta Blic
“Pjesa më e madhe e njerëzve që punojnë në media dhe në kancelaritë evropiane janë brez tjetër tashmë. Ata do e dëgjojnë një gjë më të vjetër se Gjykata Ndërkombëtare e Drejtësisë, në vend të 3 shkronjave GJND, me shumë gjasë më shpesh dëgjojnë katër numra, 1244”, ka thënë ai.
