Kryetari i LDK-së Lumir Abdixhiku, ka kritikuar qasjen e Qeverisë së Kosovës ndaj situatës në veri, përcjell InLajmi.
Abxhiku thotë se Qeveria e Kosovës po e normalizon “situata jonormale” në veri, duke mos ndërmarrë veprime për të zëvendësuar qindra policë, prokurorë, gjyqtarë e punëtorë që janë tërhequr nga institucionet e Kosovës.
Sipas tij, Kurti tashmë ka rënë në kurthin e Serbisë, pasi nuk e ka asnjë plan shtetëror për të ballafaquar këtë gjendje.
Abdixhiku thotë se Qeveria duhet të kërkojë ndihmë edhe nga aleatët ndërkombëtarë, pasi siç thekson ai, çdo sjellje e vonuar dhe e pakoordinuar është vazhdimësi e rënies në kurthin e Serbisë.
Postimi i plotë i tij:
Normalizimi i jonormales
Albin Kurti tashmë ka rënë në kurthin e Serbisë. Ai s’mund as të krijojë stabilitet e as të ushtrojë sovranitet në veri. Ai sot nuk ka as edhe një plan shtetëror për të ballafaquar gjendjen në veri.
Barrikadat e grupeve kriminale po bëhen tashmë të zakonshme, siç po bëhet i zakonshëm dhe moszëvendësimi i qindra policëve të dorëhequr, prokurorëve, gjyqtarëve e punëtorëve administrativ në veri që s’ushtrojnë detyrat pa të cilat shteti nuk ka përfaqësim. Për më tepër, sot Kosova as nuk ka institucione shtetërore në veri e as që mund të organizojë zgjedhje demokratike për t’i zgjedhur këto institucione aty. Pra jemi në vakum administrativ. Nëse ishte keq e rëndë në Veri, sot është dhe më keq e edhe më rëndë se që ishte paraprakisht. Kjo është e vërteta në veri dhe këtë të vërtetë institucionet e Kosovës s’mund ta lejojnë të normalizohet tani.
Fjalimet e kota e populliste nga foltoret në Prishtinë sot humbasin përbrenda thatësisë. Sot humbasin dhe zërat që i kërkonin Kosovës t’i shpërfaqë sovranitetin aleatëve tanë, tek po të njëjtit aleatë që thirremi sot për ndihmë kur bandat kriminale të Serbisë e Rusisë veprojnë në territorin tonë lirshëm e pa pengim.
Prandaj koordinimi është mençuri e maturi. Ecja me aleatë ka qenë gjithnjë interes kombëtar i Kosovës. Ai shpërfaqet si servilitet vetëm përpara politikanëve të turmave e ideologëve anti-perëndim që për qëllim të hapur mbajnë rrënimin zhbërjen e Republikës së Kosovës.
Qeveria e Kosovës duhet të kërkojë ndihmë. Nga aty të koordinojë çdo hap të ardhshëm me aleatë për të kthyer rendin e ligjin në veri. Sjellja e vonuar, apo e pakoordinuar, është vazhdimësi e rënies në kurthin e Serbisë. /InLajmi/
