Kryetari i Partisë Demokratike të Kosovës, Memli Krasniqi, ka thënë se barrikadat duhet të hiqen menjëherë në pjesën veriore të Kosovës, përcjell InLajmi.
Krasniqi ka thënë se atje po krijohet një normalitet i ri si pasojë e mosreagimit nga ana e Qeverisë duke e injoruar dhe heshtur por për ata që kanë veshë për të dëgjuar dhe sy për të parë, këmbana po bie fuqishëm u shpreh ai.
Ai gjithashtu shtoi se vështrimi nga larg nuk është zgjidhje pasiqë ushtrimi i sovranitetit dhe i shtetit ligjor në tërë territorin e vendit kërkojnë veprim të menjëhershëm, barrikadat duhet të hiqen menjëherë sepse sipas tij sovraniteti i Kosovës po cenohet.
Postimi i plotë i tij:
Për kë bie këmbana?
Në pjesën veriore të Kosovës po ndodhë pikërisht ajo që kemi paralajmëruar ditë më parë dhe, e cila, në asnjë mënyrë nuk guxon të ndodhë. Barrikadat po kthehen në përditshmëri para syve të Qeverisë. Vetëm pse Qeveria po heshtë dhe po e injoron si fakt, kjo nuk do të thotë se në pjesën veriore nuk po krijohet një realitet i ri. Për ata që kanë veshë për të dëgjuar, e sy për të parë, këmbana po bie. Fuqishëm. Zëshëm.
Vështrimi nga larg nuk është zgjidhje. Kompromiset e mëtutjeshme, edhe më pak. Ushtrimi i sovranitetit dhe i shtetit ligjor, si dhe funksionimi i institucioneve të Republikës së Kosovës në tërë territorin e vendit kërkojnë veprim të menjëhershëm dhe konsistent institucional. Barrikadat duhet të hiqen pa asnjë vonesë.
Duke qëndruar me Policinë e Kosovës, kërkojmë urgjentisht nga Qeveria plotësimin e kushteve të tyre, që ata të zbatojnë rendin dhe ligjin në pjesën veriore të Kosovës. Koha është për rikthim të normalitetit dhe garantim të sigurisë për të gjithë qytetarët e Kosovës në këtë pjesë të shtetit tonë.
Për atë çfarë mund të bëhet sot, nesër mund të jetë shumë vonë. Kosova nuk e ka këtë komoditet. Sovraniteti i shtetit tonë po cënohet. E ardhmja jonë po rrezikohet. Kërkohet reagim i menjëhershëm. Hiqni ato barrikada të turpshme dhe dëshmojuni qytetarëve se jeni pranë tyre. Mos e braktisni Kosovën!/InLajmi/
