Buna, vajza e ish-komandantit të UÇK-së, Sali Mustafa ka shkuar në Hagë për të vizituar babain pas dënimit me 26 vjet që mori nga Gjykata Speciale, përcjell InLajmi.
Buna e ka cilësuar si sfidë për familjen dënimin e babait, si dhe përulje për kombin shqiptarë.
Ajo ka treguar se gjatë vizitës në Hagë babai i saj Mustafa ishte më i fortë se kurrë dhe kokëlartë.
Tutje, Buna tregon se në bisedë e sipër babai i ka thënë “Patriotizmi në ditë të sotit tregohet përmes punës së juaj të ndershme, arritjeve të juaja. Serbët nuk i keni më aty. E ata që ju respektojnë, i respektoni 2 herë më shumë.”
Në fund, ajo ka shprehur falënderimet e saj për familjarët, miqtë e gjithë popullin shqiptar për përkrahjen që i kanë dhënë babit të saj.
Postimi i plotë i saj:
Një sfidë më shumë për familjen tonë, një përulje tjetër për kombin shqiptarë. Unë sapo dola nga vizita me babin. Nuk kam pasur asnjëherë bisedë më të dashur, më të çlirë dhe më të ndjerë me të. Babi ishte më i fortë se kurrë e më kokëlartë se kurrë. “Patriotizmi në ditë të sotit tregohet përmes punës së juaj të ndershme, arritjeve të juaja. Serbët nuk i keni më aty. E ata që ju respektojnë, i respektoni dy herë më shumë.” Kjo ishte një pjesë e bisedës sonë sot, ku përçohet edhe morali i lartë i babit.
Faleminderit familjarëve, miqëve të afërt dhe të gjithë popullit për këtë përkrahje! Por, edhe unë kam të njejtën pyetje: “Në emër të cilit popull?”. /InLajmi/
