Presidentja e Republikës së Kosovës, Vjosa Osmani në fjalimin e saj vjetor para deputetëve të Kuvendit, ka theksuar se viti 2022 ka qenë një vit i rrethanave të jashtëzakonshme e rrjedhimisht, një vit i zhvillimeve sfiduese, raporton InLajmi.
Ajo falenderoj qytetarët e Kosovës për angazhimin dhe punën e palodhur që secila ditë të jetë më e mirë se tjetra.
“Por, ajo që dua të bëj në fillim të këtij adresimi është të falënderoj qytetarët e Kosovës, bashkëqytetarët e mi, për punën e palodhur, qëndrueshmërinë e pashoq, dhe angazhimin e çdoditshëm që secila ditë të jetë më e mirë se tjetra”, ka theksuar Presidentja Osmani.
Presidentja e vendit mori shembuj nga jeta e përditshme, për sakrificën e secilit person për ta përmirësuar Kosovën e për ta bërë një vend më të mirë.
“Është ai taksisti që punon përtej orarit për të mbajtur familjen e tij, është mësuesja e shkollës që me mjeshtëri edukon një gjeneratë të tërë dukë dhënë mësim në një klasë të stërmbushur, është infermierja që sakrifikon gjumin e natës për shëndetin tonë kolektiv, është pronarja e biznesit të vogël në një cep të lagjes që kryelartë zhvillon aktivitetin biznesor përkundër parametrave ekonomik që aktualisht nuk janë fort të favorshëm, është një mozaik kaq i larmishëm i individëve që realisht janë heronjtë tanë të përditshëm”, është shprehur Presidentja Osmani në fjalimin e saj.
Ajo shtoi se Kosova përmes qytetarëve të saj fuqizohet çdo vit e më shumë.
“Janë qytetarët tanë që na konfirmojnë çdo herë se kur krijohen kushtet e duhura dhe garantohen platforma adekuate, suksesi është pothuajse përherë i sigurt. Këtë na e keni dëshmuar me arritjet tuaja në art, sport, shkencë e kudo tjetër. Si e tillë, nga viti në vit, Kosova jonë me ju dhe përmes jush fuqizohet gjithnjë e më shumë”, ka theksuar Presidentja.
Në këtë fjalim të presidentes Vjosa Osmani nuk kanë marrë pjesë Grupi Parlamentar nga PDK-ja dhe Grupi Parlamentar nga AAK-ja, duke e vlerësuar si fjalim pa përmbajtje dhe farsë./InLajmi/
