Shefi i Grupit Parlamentar të LDK-së, Arben Gashi tha se Projektligji mbi Ndarjet Buxhetore duhet të ndryshohet urgjentisht, raporton InLajmi.
Gashi theksoi se në nenin 9, paragrafi 6, duhet të hiqet fjalia ku thuhet se të hyrat vetanake të komunave duhet të kalojnë në buxhetin shtetëror në rast se nuk shfrytëzohen.
“Në bazë të rregullores së Kuvendit, Grupi Parlamentar i LDK-së ka propozuar amandamentim në tekstin e Ligjit. Në Nenin 9, paragrafi 6, propozojmë që të hiqet fjalia të gjitha të hyrat vetanake të mbledhura para vitit fiscal 2022 dhe të pashpenzuara, bëhen pjesë e Fondit Kosovar në bilancin banker. Kjo fjali është në kundërshtim me Kushtetutën e Kosovës dhe në kundërshtim me Ligjin për Financat e Pushtetit Lokal, Ne e konsiderojmë se nëse mbetet në mënyrën e tillë, është dëmtim i jashtëzakonshëm i buxhetit lokal dhe është shkelje e drejtpërdrejtë e Kushtetutës së Kosovës”, ka deklaruar Gashi.
Shefi i Grupit Parlamentar të LDK-së potencoi se nëse ky amandament nuk kalon atëherë Lidhja Demokratike e Kosovës do ta dërgojë në Gjykatën Kushtetuese këtë projektligj.
“Nëse nuk kalon ky amandament, ky projektligj do të jetë në kundërshtim me Kushtetutën e Kosovës dhe ne si Grup Parlamentar do ta dërgojmë në Gjykatë Kushtetuese”, ka deklaruar ai.
Deputeti Gashi shtoi se ky ndyshim është i nevojshëm, sepse është në kundërshtim me Kushtetutën e Kosovës dhe me Ligjin për Financat e Pushtetit Lokal./InLajmi/
