Me 14 dhjetor 2018 Kuvendi i Kosovës mori vendim që Forcat e Sigurisë së Kosovës të shndërrohen në ushtri, shkruan InLajmi.
Parlamenti i Kosovës me 106 vota pro dhe një abstenim, më 14 dhjetor 2018 miratoi 3 ligjet që e ndryshojnë mandatin e Forcës së Sigurisë së Kosovës në ushtri të Kosovës, por pa iu ndërruar emri.
Ndonëse emri i FSK-së nuk pëson ndryshime për shkak të pamundësive për ndryshime kushtetuese, ligjet e miratuara vlerësohet se i japin FSK-së kapacitete ushtarake gjatë një procesi transformimi brenda disa viteve.
Bëhet fjalë për Ligjin për Ministrinë e Mbrojtjes, atë për Forcën e Sigurisë së Kosovës dhe Ligjin për Shërbim në Forcën e Sigurisë së Kosovës.
Seanca ka filluar me një minutë heshtje për të nderuar, siç është thënë, “të gjithë ata që u vranë dhe sakrifikuan” duke dhënë kontributin e tyre për lirinë dhe pavarësinë e Kosovës.
Votimi është përcjellë me duartrokitje të gjata në Kuvend.
Kryetari i atëhershëm i Kuvendit, Kadri Veseli, ka thënë se me këtë votim po fillon një epokë e re për shtetin e Kosovës.
Vendimi për formimin e Ushtrisë së Kosovës u përcoll me një atmosferë festive në Prishtinë. Sheshet e kryeqytetit janë mbushur me flamuj të Shteteve të Bashkuara të Amerikës, Britanisë së Madhe, Gjermanisë, Francës, Italisë dhe shteteve tjera, të cilat Kosova i konsideron si vende që e kanë ndihmuar në vazhdimësi atë.
Në seancën ku u miratua formimi i kësaj ushtrie nuk morën deputetët e Listës Serbe, sepse ishin kundër formimit të Ushtrisë së Kosovës./InLajmi/
