Shënohet 24 vjetori i rënies heroike të komandantit të Brigadës 113 të Zonës Operative të Drenicës, Mujë Krasniqi, i njohur me nofkën “Kapuçi” dhe të 41 bashkëluftëtarëve të tij, në kufirin shqiptaro-shqiptar, shkruan InLajmi.
Gjatë mëngjesit të acartë të 14 dhjetorit 1998, luftëtarët e UÇK-së derisa po sillnin armë në Kosovë, kishin rënë në pritën e organizuar nga ushtria dhe policia e armikut, te vendi i quajtur “Te Likenet e Hasit” në Gorozhup të Pashtrikut.
Në luftimet e pabarabarta, u plagosën edhe dhjetëra luftëtarë, ndërsa disa luftëtarë u zunë rob lufte, por pas një aksioni të zhvilluar nga luftëtarët e UÇK-së, 8 ushtarë të ushtrisë serbe ishin kapur nga luftëtarët e UÇK-së dhe me ndërmjetësimin e OSBE-së u bë këmbimi i ushtarëve të të 2-ja palëve.
Rënia e Komandantit Mujë Krasniqit dhe 41 luftëtarëve të Ushtrisë Çlirimtare të Kosovës, ishte një ndër goditjet më të mëdha për luftën tonë çlirimtare dhe luftëtarët e saj. Përkundër dhimbjes dhe pikëllimit të madh për luftëtarët, lufta nuk u ndal, derisa liria e Kosovës u bë realitet. Sepse ky ishte amaneti i tyre!
Dëshmorët e UÇK-së, të rënë në brezin kufitar shqiptaro-shqiptar, u varrosën në Polac të Drenicës me nderime larta ushtarake, më 21 dhjetor 1998./InLajmi/
