Kryeministri i Kosovës Albin Kurti, ka njoftuar për vendimet që ka marrë Qeveria e Kosovës në mbledhjen e 112-të me radhë gjatë të hënës, përcjell InLajmi.
Në këtë mbledhje janë miratuar 31 vendime nga Qeveria e Kosovës.
Qeveria e Kosovës ka ndarë mjete për subvencionimin e tarifave të energjisë elektrike, në mënyrë që çmimi i energjisë për qytetarët të jetë më i përballueshëm. Gjithashtu janë ndarë mjete për përballje me inflacionin.
Mes vendimeve të tjera, janë miratuar edhe 6 nisma për marrëveshje ndërkombëtare për projekte në infrastrukturë, drejtësi e energji.
Postimi i plotë i tij:
Në mbledhjen e djeshme të Qeverisë, të 112-të me radhë, nga 31 vendime, mes tjerash:
Miratuam 6 nisma për marrëveshje ndërkombëtare për projekte në infrastrukturë, drejtësi e energji.
Që çmimi i energjisë elektrike për qytetarët të jetë më i përballueshëm, ndamë mjete për subvencionimin e tarifave të energjisë elektrike.
Ndamë mjete për masat e Pakos për Përballje me Inflacion, në mbështetje të amvisërisë që kanë kursyer energji, për punëtorët e ndërmarrjeve publike, për punëtorët e sektorit publik dhe për studentët.
Aprovuam Planin e Veprimit për pakon e përkrahjes buxhetore për krizën e energjisë brenda fondeve IPA 2023, me vlerë prej 75 milionë euro.
Iniciuam përfshirjen e Konventës së Kombeve të Bashkuara për të Drejtat e Personave me Aftësi të Kufizuara në listën e instrumenteve ndërkombëtare në Kushtetutën e Republikës.
Miratuam kompenzimin e dëmeve të shkaktuara në bujqësi në komunat e prekura nga fatkeqësitë natyrore.
Për një shoqëri demokratike, institucione transparente, e gjithëpërfshirje në proceset qeveritare, miratuam Planin Kombëtar të Veprimit 2023-2025 për Partneritetin për Qeverisje të Hapur.
Me qëllim të institucionalizimit të kujdesit shëndetësor për pacientët me sëmundje të rralla, miratuam Koncept Dokumentin për Sëmundjet e Rralla. Miratuam edhe Projektligjin për parandalimin dhe kontrollin e sëmundjeve ngjitëse.
Themeluam Këshillin Shtetëror Organizativ për shënimin e 15 vjetorit të Pavarësisë së Republikës së Kosovës dhe 25 vjetorit te Epopesë së Ushtrisë Çlirimtare të Kosovës.
Miratuam 3 vendime për shpronësim për interes publik për realizimin e projekteve infrastrukturore në komunat e Mitrovicës dhe Podujevës.
Ndamë mjete për subvencionim të ndërtimit të shtëpive për komunitetet joshumicë, ndërtimi i të cilave kishte filluar në vitin 2019. /InLajmi/
