Zhvillimi i teknologjisë dhe përdorimi i madh i rrjeteve sociale në ditët e sotme iu ka ofruar njerëzve hapësirë të madhe komunikimi dhe liri të shprehjes së mendimit lidhur me çështje të caktuara që ndodhin në rrethin shoqëror ku jetojnë, shkruan InLajmi.
Pra, avancimi i teknologjisë ka bërë që njerëzimi të humb “arsyen” dhe në momente të caktuara përmes komenteve në rrjetet sociale të shprehin mendime joracionale e që në disa raste janë komente me gjuhë fyese, shantazhi, urrejtje për të shkuar edhe më larg edhe me përmbajtje linçuese e kërcënuese.
Ndoshta e gjithë bota përballet me një trend të tillë të komunikimit linçuese, fyese e kërcënuese, ndërsa më e dhimbshme është atëherë kur kjo dukuri negative “pushton” mendjen e shoqërisë kosovare e cila ka një traditë kulture komunikuese.
Por si shoqëri kosovare jemi dëshmitar se komunikimi ndërnjerëzor përmes rrjeteve sociale po “rrëshqet” në komunikim të “egër” aspak njerëzor e aq më pak kulturë kjo komunikuese e “çoroditur” e cila nuk përkon aspak me kulturën tradicionale të komunikimit në shoqërinë tonë.
E në lidhje më “trendin” e çoroditur të komunikimit në shoqërinë kosovare, për InLajmin ka folur sociologu i njohur kosovar, Jeton Brajshori i cili e vlerëson të papranueshme këtë gjuhë, ndërsa thotë ai se çasja e lehtë në rrjetet sociale është arsyeja bazë e komunikimit virtual me tendencë fyese, linçuese e madje edhe kërcënimi.
Tutje ai shtoi se duhet të jemi të kujdesshëm pasi sipas tij dhuna prodhon dhunë dhe se dhuna çfarëdo forme qoftë, nuk është zgjidhje.
“Duhet të kemi kujdes edhe me linçimet që i bëjmë të tjerëve sepse ajo ndikon direkt në personalitetin e tyre si dhe në familjet e tyre”, tha ai.
Ndërsa për InLajmin profesori i Departamentit të Gazetarisë, Dren Gërguri këtë problem e lidhi me mungesën e edukimit medial, pasi sipas tij edukimi medial nënkupton që secili prej qytetarëve ta ketë shkathtësinë e përdorimit të mediave.
“Secili prej nesh nëse ka diçka që nuk pajtohet thjesht të mbetet racional, të qetësohet para se të shkruaj diçka, që më pastaj atij ose asaj që e ka shkruar mund të mos i pëlqej”, tha tutje ai për InLajmin.
Juristi Arbër Jashari në një prononcim për InLajmin tha se shpifja, fyerja, gjuha ofenduese, nuk janë vepra penale, por për to mund të iniciohet padi për t’u mbrojtur nga to dhe për të kërkuar dëmshpërblim.
“Shpifja, fyerja, gjuha ofenduese, nuk janë vepra penale, por për to mund të iniciohet padi për t’u mbrojtur nga to dhe për të kërkuar dëmshpërblim, në procedurë kontestimore”, tha Jashari për InLajmin.
Mirëpo sipas tij organet e drejtësisë duhet ta shqyrtojnë secilin rast dhe asnjë prej tyre nuk duhet të neglizhohet.
Sa për korrektësi po publikojmë disa shifra zyrtare kur persona të caktuar kanë raportuar në Policinë e Kosovës rastet për “kanosje”, përmes rrjeteve sociale.
Kështu sipas raportit policor, vetëm në periudhën maj-nëntor Policia e Kosovës ka evidentuar 1.683 raste për vepren kanosje.
“Ky numër është numri i përgjithshëm i rasteve “kanosje’”pa marrë parasysh se kanosja është kryer përmes rrjeteve sociale, direkt, me telefon, me email apo në cilëndo formë tjetër”, thuhet në një përgjigje për Inlajmin nga Policia e Kosovës.
Sido që të jetë nuk mundemi të arsyetojmë formatin e komunikimeve virtuale të natyrës fyese, linçuese e kërcënuese e cila po merr përmasa të një “trendi” normal komunikimi. Libona Gegaj /InLajmi/
