Situata e tensionuar në veri të Kosovës është imponuara nga Serbia. Kështu tha anëtari i kryesisë së PDK-së, Zenun Pajaziti.
Sipas tij, deri më tani Qeveria Kurti do duhej t’i hiqte barrikadat nga veriu, duke shtuar edhe kujdesin ndaj policëve që po qëndrojnë atje.
“Në plan të parë, është Beogradi ai që po e imponon tërë këtë situatë në veri. Prandaj, nëse ne biem në provokime të tyre, atëherë do krijohet rreziku. Beogradi zyrtar është përgjegjës për veprimet e dhunshme, të njëanshme e për manipulime. Por, në anën tjetër, çështja e ushtrimit të sovranitetit, të integritetit, të funksionimit normal të institucioneve në territorin e vendit, është përgjegjësi e Kosovës. Qeveria sot duhet të shkojë t’i heqë barrikadat atje, duhet t’u dërgojë ushqim policëve. Në ndërkohë që Beogradi kërkon kthimin e ushtrisë së tyre, Qeveria Kurti fajëson pushtetet e kaluara”, deklaroi Pajaziti.
Zenuni vlerësoi se në qoftë se vendimi për shtyrjen e targave ilegale do merrej një muaj më herët, gjendja nuk do ishte e tillë.
“Ata mezi nuk pritën ta kemi një gjendje të tillë ku nuk ka fare institucione të Kosovës atje”, tha më tej Pajaziti.
Ndërkaq, sa i përket takimit i cili veçse ka filluar mes kryeministrit Albin Kurti me emisarin e Bashkimit Evropian për dialogun Kosovë-Serbi, Miroslav Lajcak dhe të dërguarin e SHBA-së për Ballkanin Perëndimor, Gabriel Escobar, Pajaziti tha se kjo është një vizitë e koordinuar mes SHBA-së dhe BE-së, tha ai në Tëvë1.
“Gjithashtu është një interes më i shtuar ndaj Kosovës, e sidomos i BE-së. Vizita e tyre është tani në një kohë tensioni shumë të madh në teren. Nuk mund të themi diçka konkrete, nuk mund t’i parashikojmë gjërat. Në këtë rast pozicioni ynë është më i vështirë, pasi që jemi në një fazë ku na duhet njohja e shteteve të BE-së, na duhet përmbyllja e një procesi të dialogut”, potencoi Pajaziti tutje.
