Kryetari i Sindikatës së Policisë së Kosovës, Imer Zeqiri ka deklaruar se vendosja e barrikadave në disa pjesë të veriut të vendit ka vështirësuar lëvizjen e zyrtarëve policorë.
Ai në emisionin “Ditari” në tëvë1 ka konfirmuar se disa policë tashmë janë në pikën kufitare në Jarinje dhe nuk kanë arritur që të ndërrohen nga kolegët e tyre për shkak të barrikadave.
Zeqiri ka treguar ata janë mirë me shëndet dhe se po furnizohen vazhdimisht edhe me ushqim por edhe të gjitha nevojat e tyre atje.
“Janë duke u bërë përpjekjet në maksimum që të funksionoj gjithçka në rregull. Sa i përket Policisë në veri ata janë mirë edhe me shëndet edhe moral, janë të përgatitur dhe duke kryer detyrat e tyre në mënyrën më të përpiktë më të mundshme përkundër vështirësive janë duke u bërë të gjitha përpjeket edhe nga menaxhmenti i PK-së edhe planifikimet operacionale janë duke shkuar sipas planit dhe janë marrë të gjithë masat për mbështetje logjistike dhe të gjitha nevoja që i kanë atje”, tha ai.
Tutje, kryesindikalisti tregoi se Policia e Kosovës ka të gjitha kapacitetet për zhbllokimin e rrugëve dhe se po presin një urdhër për ta bërë këtë.
“Po du me thënë që janë të përgatitur për gjithçka por vështirësitë që i kanë kriju barrikadat kemi zyrtarë policorë që po qëndrojnë atje. Mirëpo, thjesht janë duke qëndruar mirë me moral të lartë me shëndet janë mirë, kështu që të shohim. Kjo çështja e zhbllokimit të rrugëve po më duket më shumë ka mbetë në dorë të politikanëve dhe nuk e di pse po them kështu ndoshta s’është në kompetencë time Bashkësia Ndërkombëtare nuk po vepron më shpejtë apo thënë më mirë pse gjithë kjo përkëdhelje. Sigurisht që po sepse e dijmë që edhe KFOR janë prezent dhe nuk e di çfarë sinjali por duhet zhvilluar, Policia ka kapacitet që të sigurojë gjithë territorin edhe që të bëjnë zhbllokimin e këtyre rrugëve, sigurisht jemi në pritje të një urdhri”, tha ai.
Teksa foli për sigurinë e pjesëtarëve të PK-së që janë në Mitrovicën Veriore, Zeqiri tha se pas zhvillimeve të fundit mund të ndjejnë një rrezik më të madh.
“Normal që pas këtyre zhvillimeve mund të ndjejmë një rrezik më të madh. I kanë të gjitha kushtet logjistike mirëpo ndoshta nuk është momentumi që ta shfrytëzojmë po e them pra që ne si Sindikatë ka më shumë se një vit kemi ngritë zërin dhe kemi paraqitë mirëqenien e PK-së në përgjithësi dhe kjo mirëqenie nuk është përmirësuar”, tha ai.
