Lidhja Demokratike e Kosovës e ka dënuar sulmin ndaj EULEX-it dhe Policisë së Kosovës, duke thënë se shprehë shqetësim për gjendjen e sigurisë në veri të vendit, përcjell InLajmi.
Nga LDK-ja njoftuan se se sulmet ndaj forcave të sigurisë, qofshin ato vendore apo ndërkombëtare dhe mbyllja e rrugëve të qarkullimit e cenojnë rendin kushtetues të Republikës së Kosovës, prandaj autorët e këtyre sulmeve duhet të sillen para drejtësisë së Kosovës.
Nga LDK-ja i bëjnë kërkesë Qeverisë së Kosovës që të koordinohet në çdo veprim me SHBA-të dhe BE-në, si mënyrë e vetme për të rikthyr rendin, sigurinë dhe lëvizjen e lirë në territorin e Kosovës.
Njoftimi i plotë nga Lidhja Demokratike e Kosovës:
Lidhja Demokratike e Kosovës shpreh shqetësimin e thellë për gjendjen e sigurisë në veri të vendit.
Sulmet ndaj institucioneve të Republikës, pjesëtarëve të Policisë së Kosovës dhe të EULEX-it, si dhe barrikadimi dhe mbyllja e rrugëve janë veprime që cënojnë rendin kushtetues të Republikës prandaj si të tilla ato janë të papranueshme. LDK-ja i dënon ashpër këto veprime dhe kërkon që autorët e sulmeve të sillen para institucioneve të drejtësisë së Republikës së Kosovës.
LDK-ja edhe një herë përsërit kërkesën e saj ndaj Qeverisë dhe institucioneve të tjera të vendit për koordinim të veprimeve me partnerët e Kosovës, si rrugë e vetme drejt kthimit të rendit, sigurisë dhe lëvizjes së lirë në gjithë territorin e Kosovës. Çdo rrugë tjetër është rënie në kurthin e synimeve destabilizuese të Serbisë.
LDK kërkon nga Qeveria e Kosovës plan të qartë për të zgjidhur situatën e sigurisë në veri. Në këto momente vendit i duhet lidership i vërtetë që do të veprojë me mençuri dhe vendosmëri; që në vend ndarjes e përçarjes siguron unitet të brendshëm e koordinim të ngushtë me aleatët tanë.
LDK – Zyra për Informim./InLajmi/
