4 pjesëtarë të Policisë së Kosovës janë lënduar pas trazirave në ndeshjen e basketbollit ndërmjet Prishtinës dhe Trepçës të zhvilluar në Pallatin e Rinisë në Prishtinë.
“Sot rreth orës 18:00, në Pallatin e Rinisë, gjatë një ndeshje basketbolli, ka ndodhë një incident, ku tifozët duke dëmtuar sallën, janë gjuajtur mes vete me mjete të forta, me ç ‘ rast kanë lënduar 4 zyrtarë policor, të cilët ishin në detyrë, të angazhuar për menaxhimin e situatës. Nga ana e tifozëve, deri tani nuk është raportuar për ndonjë të lënduar. Pas vënies nën kontroll të situatës, policia në koordinim me prokurorin e shtetit, kanë nisë një hetim për identifikimin dhe arrestimin e peronave të dyshuar për veprat Sulm ndaj personit zyrtar dhe asgjësim apo dëmtim i pasurisë”.
Ndërsa, për dhunën në palestër ka reaguar edhe ministri i Kulturës, Rinisë dhe Sportit, Hajrullah Çeku.
Ai duke ju uruar shërim policëve të lënduar, ka thënë se lëndimi i policëve në një periudhë të vështirë pas zhvillimeve në veri është i turpshëm.
Çeku ka thënë se palestrat sportive nuk janë për njerëzit që kanë probleme me vetëpërmbajtje.
“Në një periudhë aspak të lehtë për shtetin tonë për shkak të zhvillimeve në veriun e Kosovës, lëndimi i policëve në një ndeshje basketbolli është veprim i turpshëm, i papranueshëm dhe i dënueshëm. Sporti nuk është luftë. Palestrat dhe fushat e sportit nuk janë për “trimat” që kanë problem me vetëpërmbajtjen. Për fajin e disave, jemi duke pësuar të gjithë, është duke pësuar sporti i Kosovës. Grupet e tifozëve, në emër të mbështetjes së klubeve të tyre të zemrës, janë duke e shkatërruar shpirtin sportiv dhe duke i shndërruar palestrat dhe fushat e sportit në ambiente të pasigurta për qyterarët sportdashës”, tha Çeku raporton teve1.info.
Pas përfundimit të pjesës së parë ka pasur hedhje të mjeteve plasëse e po ashtu karrige të thyera dhe të hedhura në parket. Gjithashtu kishte edhe përpjekje për përleshje, por që intervenimi i shpejtë i Policisë parandaloj përleshjen.
Sigal Prishtina e ka fituar Superkupën e Kosovës në basketboll, një finale që mbeti hije e incidenteve të rënda në tribunat e palestrës së vogël në Pallatin e Rinisë në Prishtinë. Prishtina e mposhti Trepçën me rezultatin e lartë, 73:54.
