Ministri i Mbrojtjes Armend Mehaj, gjatë vizitës zyrtare në Finlandë ka vizituar Qendrën Ndërkombëtare “Hybrid CoE”, ku edhe diskutoi për parandalimin e luftës hibride, përcjell nLajmi.
Mehaj njofton se është dakorduar me anëtarët e sekretariatit dhe drejtuesin e “Hybrid CoE” Ramus Hindren, që të fillojnë bashkëpunimin në shkëmbimin e informatave për kërcënimet që merr Kosovan nga lufta hibride.
Gjatë takimit, ministri ka theksuar edhe luftën hibride që po ndodhë nga Rusia edhe në Ballkan nëpërmjet Serbisë.
Ndryshe në Qendrën Ndërkombëtare për parandalimin dhe luftimin e luftës hibride bëjnë pjesë 32 shtete anëtare të Bashkimit Evropian dhe të NATO-s.
Postimi i plotë i tij:
Lufta hibride, kërcënimi që duhet mposhtur!
Gjatë vizitës zyrtare në Finlandë, vizitova dhe Qendrën Ndërkombëtare për parandalimin dhe luftimin e luftës hibride, Hybrid CoE, pjesë e së cilës janë 32 shtete anëtare të Bashkimit Evropian dhe të NATO-s.
Me anëtarët e sekretariatit të kësaj qendre dhe drejtuesin e saj, Rasmus Hindren, diskutuam rreth luftës hibride që po ndodhë aktualisht nga Rusia në shumë drejtime, e nëpërmjet të Serbisë edhe në rajonin e Ballkanit.
U dakorduam që të fillojmë bashkëpunimin në shkëmbimin e informatave dhe analizimin e kërcënimeve hibride, gjetjen e strategjisë për mbrojtje dhe parandalimin e aktiviteteve të tilla të cilat cënojnë vlerat demokratike të shteteve. /InLajmi/
