Shefi i Grupit Parlamentar të PDK-së Abelard Tahiri, në seancën e së premtes shprehu shqetësimin për situatën e tensionuar në veri, ndërsa theksoi se Republikës së Kosovës më shumë se kurrë i duhet koordinim me SHBA-të, raporton InLajmi.
Derisa vlerësoi se situata në veri të vendit po rritë tensionet vazhdueshëm, Tahiri para ligjvënësve tha se jemi në situatë që duhet të koordinohemi e të mos marrim vendime të çastit.
“I bëjmë thirrje Qeverisë që të ketë strategji për secilin veprim që e merr në atë pjesë të Republikës së Kosovës e mos të jenë hapa at-hoc”, tha tutje Tahiri.
Tahiri tha se PDK-ja e dënon rëndë aktin e plagosjes së policit në pjesën veriore të vendit dhe tha se policia e ka konfirmuar se në veri ka banda kriminale, që burimin e kanë në Serbi.
“E dënojmë rëndë aktin e plagosjes së policit në pjesën veriore të vendit. Policit i urojmë shërim të shpejtë. Tashmë kemi edhe konfirmimin zyrtarë të pranisë së bandave kriminale që pa dyshimim origjinën e kanë në Serbi e askush tjetër” deklaroi ai.
Deputeti Tahiri theksoi se Serbia është e angazhuar që ta destabilizojë sigurinë në Kosovë dhe tani më shumë se asnjëherë më parë Kosova duhet të ketë koordinim të plotë me SHBA-të.
“Po shohim angazhim të Serbisë për ta nxjerrë nga binarët sigurinë në Kosovë. Republikës sonë më shumë se kurrë i duhet koordinimi me SHBA-në” përfundoi Tahiri.
Këto deklarata Shefi i Grupit Parlamentar të PDK-së i bëri në seancën plenarë të Kuvendit të Kosovës, për shqyrtimin e Projektligjit për Paga në sektorin publik./InLajmi/
