Incidentet e përditshme në veriun e Kosovës nga grupet kriminale atje, sikur edhe rasti i fundit i plagosjes së zyrtarit policor, përveç klimës së vrazhdë politike sollën edhe pasiguri, gjë që reflekton edhe në mundësinë e realizimit të zgjedhjeve të jashtëzakonshme në 4 komunat veriore, shkruan InLajmi.
Sulmin ndaj Policisë së Kosovës në Zubin Potok, eksperti i sigurisë Drizan Shala, e sheh si tentativë të Serbisë që çështjen faktike të veriut ta paraqesë me çdo kusht si “problem politik”.
Sipas Shalës, këto sulme i kontribuojnë edhe më shumë skenarit të Beogradit për destabilizimin e pjesës veriore.
“Sulmet ndaj zyrtarëve policorë tregojnë qartë se Serbia me çdo kusht dhe me çdo formë po tenton që çështjen faktike të pjesës veriore ta paraqesë si problem politik dhe mbi këtë bazë të tentojë të arrijë sa më shumë marrëveshje eventuale në favor të Serbisë. Pra, sulmet e tjera i kontribuojnë skenarit të Beogradit për destabilizim të pjesës veriore”.
Eksperti i sigurisë Shala vlerëson se “rruga më e mirë” pas tensionimit të situatës është shtyrja e zgjedhjeve dhe koordinimi me aleatët ndërkombëtarë.
“Nga ana e Qeverisë së Kosovës duhet maturi dhe njëkohësisht duhet një koordinim me partnerët tanë strategjikë, që tensionimi të mos jetë fare pjesë e agjendës dhe kështu të arrihet që në afatin sa më optimal të mundshëm të mundësohet një klimë e përshtatshme politike për të përmbyllur procesin zgjedhor, siç planifikohet të shtyhet nga 18 dhejtori për muajin janar”.
Njësoj mendon edhe analisti politik Milazim Krasniqi, i cili thotë se zgjedhjet në veri duhet të shtyhen, ngase kjo mund të çojë në një konflikt të rrezikshëm.
Sipas Krasniqit, çështja e targave dhe shpallja e zgjedhjeve i kanë dhënë pretekst ekstremistëve serbë për ta ashpërsuar situatën atje.
“Fatkeqësisht, po shkohet drejt një konflikti të rrezikshëm në veri, e kjo për arsye se veprimet që janë ndërmarrë nga ana e Qeverisë qoftë me çështjen e targave, qoftë me shpalljen e zgjedhjeve vetëm se i kanë dhënë pretekst ekstremistëve serbë dhe Serbisë për ta ashpërsuar situatën atje, prandaj siç ka qenë vendim i pamendshëm vendimi për targat, ashtu është edhe shpallja e zgjedhjeve. Prandaj, besoj që qeveria duhet ta ndalë këtë politikë që mund të nxisë konflikt, ajo duhet t’i shtyjë zgjedhjet dhe duhet të fokusohet në një dialog politik sepse pa këtë dialog nuk ka asnjë shancë që të riintegrohet veriu dhe të arrihet marrëveshje paqësore”.
I pyetur nëse mbajtja e zgjedhjeve mund të sjellë destabilizimin e vendit apo edhe të Ballkanit, analisti Krasniqi pohon se do të jetë e vetmja Kosova, e cila mund të bëhet “vatër” e kësaj krize.
Krasniqi i bën thirrje Kurtit që t’i frenojë këto veprime dhe problematikën e zgjedhjeve ta zgjidhë përmes dialogut.
“Ballkanin nuk mund ta çojë në destabilizim sepse është i sigurtë. Shqipëria, Mali i Zi dhe Maqedonia e Veriut janë në NATO dhe nuk mund t’i prekë askush. Në krizë mund të futet vetëm Kosova, e cila është vatër e kësaj krize, madje as Serbia nuk preket nga kriza sepse Serbia ka në veri ekstremistë të armatosur, ka struktura paramilitare, të cilat janë të mjaftueshme për ta destabilizuar Kosovën. Pra, Albin Kurti duhet t’i frenojë këto veprime jorealiste dhe të kërkojë që e gjithë kjo problematikë të zgjidhet përmes procesit të dialogut. Në qoftë se nuk ndalet atëherë vetëm po hyn në skemën e Serbisë dhe Rusisë, të cilëve u konvenon konflikti”.
Nga ana tjetër, eksperti i sigurisë Fadil Kajtazi thotë se rruga e vetme për “shtensionimin” e situatës është aksioni diplomatik.
“Intensiteti i sulmeve do të shtohet varësisht prej komandes që ata marrin nga presidenti i Serbisë Vuçiq. Situata nuk ka eskaluar nga shkaku se shteti i Kosovës ka kufizuar të drejtat kushtetuese të serbëve, por nga shkaku se Serbia dëshiron ta aneksojë atë territor, qeveria e jonë nuk i ka menaxhuar politikisht si duhet këto veprime. E vetmja rrugë mbetet aksioni diplomatik, i cili sipas të gjitha gjasave është i dështuar”.
Sipas Kajtazit, parakusht për mbajtjen e zgjedhjeve në veri është ofrimi i sigurisë për pjesëmarrësit në procesin zgjedhor.
“Dalja në zgjedhje dhe konstituimi i organeve shtetërore që burojnë nga rezultati i zgjedhjeve, në fakt është pranimi i rendit kushtetues, në këtë rast i Kosovës, dhe pikërisht këtë e synon Vuçiq që zgjedhjet të mos zhvillohen. Kushti themelor për t’u zhvilluar zgjedhet është siguria e atyre që zbatojnë këtë proces dhe e atyre që dalin në zgjedhje, kjo per momentin nuk ekziston”.
Veriun si “fushë të minuar” e shohin edhe poltikani Skender Hyseni dhe ish-kryenegociatorja Edita Tahiri, të cilët shkrepjen e armëve në veri e ndërlidhin me historinë e Ballkanit, që jo rrallë herë kanë shënuar fillimin e “një lufte shkatrrimtare”. Shqipe Vishaj /InLajmi/
