Trajneri i kombëtares kroate, Zlatko Daliq, është shprehur i lumtur pas fitores dhe kualifikimit në gjysmëfinale të Kampionatit Botëror në Katar.
Daliq potencoi se kjo fitore është për të gjithë popullin kroat, teksa shtoi se gjysmëfinalja nuk do të jetë fundi për Kroacinë.
“Kjo është vetëm për popullin kroat. Ne kemi nevojë për këtë dhe me të vërtetë gjithë meritë për djemtë. Një ndeshje e shkëlqyer nga minuta e parë deri në të fundit. Ne eliminuam favoritin më të madh. Kjo është Kroacia, krenaria, guximi, besimi dhe patriotizmi. Ky nuk është fundi i nesh, le të vazhdojmë tutje”, tha Daliq, transmeton Klankosova.tv.
“Kjo është një fitore për të gjithë ne, të gjithë dhanë maksimumin. Faleminderit edhe atyre në pankinë, që jetojnë edhe për këtë kombëtare. Dua të përshëndes të gjithë miqtë e mi që shkruajnë dhe komentojnë. Le ta gëzojnë të gjithë kroatët në të gjithë botën. Ne mund të bëjmë më shumë”.
