Aleanca për Ardhmërinë e Kosovës tha se kjo parti kërkon nga Qeveria e Kosovës që të ndryshojë Ligjin për Skemat Pensionale të Financuara nga Shteti, raporton InLajmi.
Deputeti i Aleancës për Ardhmërinë e Kosovës, Shemsedin Dreshaj, ka mbajtur konferencë për medie në lidhje me kundërshtimet që kanë për plotësim-ndryshimin e Ligjit për Skemat Pensionale të Financuara nga Shteti.
“Pra kërkesa bënë fjalë për plotësim-ndryshimin e Ligjit Nr 04/L-131, për Skemat Pensionale te Financuara nga Shteti, apo me konkretisht, për nenin 8 pika 2 të këtij ligji” tha Dreshaj.
Ai shtoi se AAK kërkon largimin e këtij neni, i cili thotë se personat që kanë të paktën 15 vite përvojë pune para datës 01.01.1999 e përfitojnë pensionin kuntributdhënës, e kjo sipas Dreshajt është diskriminuese.
“Kërkojmë largimin e këtij neni diskriminues të këtij ligji, i cili parasheh që çdo person të ketë të paktën 15 vite përvojë pune para 01.01.1999 në mënyrë që të përfitojë pensionin kontributdhënës” deklaroi ai.
Deputeti i AAK-së theksoi se nga partia e tij tashmë është bërë propozimi se pensionet kontributdhënëse t`i gëzojnë të gjithë, sepse ka të atillë që nuk e kanë pasur mundësinë t`i bëjnë 15 vite përvojë punë para datës së caktuar me këtë ligj.
“Me propozimin qe ne kemi iniciuar, parashihet qe pensionet kontributdhënëse t’i gëzojnë të gjithë pensionistët varësisht nga vitet që kanë punuar para datës 1 janar 1999. Siç e dini, kemi raste kur për një ditë, apo për një javë, dikush që nuk ka arritur t’i bëjë 15 vite nuk e gëzon pensionin e merituar. Kërkesë e jona është që të largohet ky kushtëzim jologjik, i dëmshëm dhe diskriminues për punëtorët të cilët viteve 90-ta ishin larguar dhunshëm dhe jashtëligjshëm nga institucionet shtetërore të pushtetit të atëhershëm” tha ai.
Dreshaj shtoi se kategoritë si administratë shtetërore, mësimdhënësit, mjekët, punëtorët e sigurisë janë duke u dënuar për të 2-tën herë me këtë ligj.
“Dihet se këto kategori si, administrate shtetërore, stafi arsimor, stafi shëndetësor, punëtorët e rendit dhe sigurisë, pas dëbimit nga vendet e punës, u rreshtuan dhe u organizuan për të ushqyer ndjenjën dhe shpresën për një të nesërme me të mirë në vend. Bash këta punëtorë te cilët atëherë u ndëshkuan duke u dëbuar në rruge, nga pushteti okupator i asaj kohe, sot sërish ne i ndëshkojmë për herë të 2-të me këtë ligj diskriminues duke ua mohuar të drejtën që të gëzojnë pensionin meritor, bazuar në kontributin e dhënë” potencoi Dreshaj.
Dreshaj gjithashtu tha se që nga vit i kaluar asnjë person i cili është pensionuar nuk e ka të mbuluar kriterin e përvojës së punës 15 vjeçare para datës 01.01.1999, dhe për këtë Dreshaj e fajëson qeverinë, sepse thotë se me këtë ligj ajo po mundohet t`i ikë përgjegjësisë.
Vlen te theksohet, se nga viti i kaluar asnjë person i cili pensionohet, nuk e plotëson kushtin që të jetë pjesë e skemës pensionale kontributdhënëse pasi që asnjeri nuk i ka 15 vite përvojë para 1 janarit 1999.
“Tendenca që në mënyrë të gjithmbarshme të zgjidhet problem i pensionisteve kontributdhënës, pasi që në Kosovë janë disa ligje për kategori të caktuara, nuk është asgjë tjetër përpos ikje nga përgjegjësia”, u shpreh Dreshaj.
Dreshaj tha se ky ligj, nëse ndryshon i ndihmon qytetarët ekonomikisht në këtë kohë krize, por nuk e zgjidh problemin definitv. /InLajmi/
