Albin Kurti ishte i arrestuar politik gjatë kohës së luftës në Kosovë dhe ishte liruar me 7 dhjetor të vitit 2001 dhe kjo është bërë pas presionit të ndërkombëtarëve për të liruar të burgosurit politik shqiptarë nga regjimi serb, shkruan InLajmi.
Kurti ishte arrestuar në Prishtinë më 27 prill 1999, ku fillimisht është mbajtur në Prishtinë dhe Lipjan e pastaj është transportuar në Serbi, duke qëndruar në burgun në Pozharevc e pastaj në atë të Nishit.
Ai ka qenë i dënuar me 15 vjet burgim me akuzën “cenimi i integritetit territorial dhe sovranitetit të ish-Jugosllavisë, i cili nuk ishte i vetmi shqiptar i arrestuar nga policia serbe në atë kohë, pavarësisht nga torturat që përjetoi ishte i vetmi që doli nga burgu i Nishit në atë kohë.
Pas daljes nga burgu, ai kishte thënë para mediave se shokët e tij vazhdonin të dergjeshin në burgjet e Nishit, disa të lënduar e disa të sëmurë, por të fortë psiqikisht.
“Ka ngjarë ajo që më së paku kam dëshiruar, jam liruar i vetëm, individualisht. Shokët e mi vazhdojnë të mbahen pengje nëpër burgjet e Serbisë. Shumica dërmuese e tyre janë me shëndet të rrënuar, ose të plagosur ose të 2-ja këto, mirëpo ata vazhdojnë të qëndrojnë të fortë moralisht dhe psiqikisht” kishte thënë ai.
Gjithashtu, ai kishte shtuar se nuk ka kërkuar amnisti, por vetëm drejtësi për popullin e Kosovës.
“Nuk kam kërkuar që të më amnistojnë ose falin, kam kërkuar vetëm drejtësi, të popullit tim dhe ndërkombëtare. Drejtësia dhe e vërteta në të ashtuquajturat Serbi dhe Jugosllavi kanë qenë dhe janë e kundërta e kuptimit” këto ishin fjalët e tij.
Në pikën kufitare në Merdare pas hyrjes në Kosovë, Kurti kishte thënë se mënyra e lirimit të tij ishte me prapavije. Sipas tij, regjimi i Beogradit e kishte liruar Kurtin me qëllim që t`ua zgjasë burgimin shokëve të tij, të cilit vazhdonin të ishin të burgosur.
“Nuk duhet fokusuar në lirimin tim por mënyrën e këtij lirimi, motivet dhe pasojat. Regjimi pseudodemokratik i Beogradit lirimin tim e ka përdorur si mjet për t’ua zgjatur robërinë shokëve të tjerë që vazhdojnë të mbahen në burgje. Në këto momente më shumë më mungojnë ata sesa familja ime”, ishte shprehur Kurti.
Albin Kurti është arrestuar më 27 prill 1999 në Prishtinë. Deri me 2 maj 1999 është mbajtur në burgun e Prishtinës. Prej 2 maj deri më 10 qershor në burgun e Lipjanit. Pastaj prej 10 qershorit deri më 13 dhjetor 1999 në burgun e Pozharevcit. Prej 13 dhjetorit deri më 13 mars 2000, në burgun e Nishit.
Procesi gjyqësor ndaj Albin Kurtit ka filluar më 9 mars 2000 ndërkaq më 13 mars është shqiptuar dënimi prej 15 vjetësh nën akuzën “cenimi i integritetit territorial dhe sovranitetit të Jugosllavisë” sipas nenit 116.
Sërish, prej 14 mars 2000 deri në nëntor, ka qenë në burgun e Pozharevcit. Intervista e dhënë në burg është më 22 prill 2000.
Prej nëntorit të vitit 2000 deri më 3 dhjetor të vitit 2001 ka qenë në burgun e Quprisë ndërkaq, prej 3 dhjetor 2001 deri më 7 dhjetor, sërish në burgun e Nishit.
Përveç burgut në Serbi, Kurti është arrestuar disa herë edhe në Kosovë, për protestat që i ka organizuar kundër qeverisë së atëhershme, për hedhjen e gazit lotsjellës, për pengim të seancave të Kuvendit të Kosovës dhe për ndalimin e mjeteve transportuese me mallëra serbe në Kosovë. /InLajmi/
