Në Komisionin për Buxhet, Punë dhe Transfere, është miratuar propozimi për tërheqjen e 30% të Trustit, e ky miratim erdhi si rezultat i votës me shumicë pro.
Nga nëntë vota, katër ishin për, tri kundër dhe dy abstenime.
Pro këtij propozimi votuan, Bekim Haxhiu, Mërgim Lushtaku, Avdullah Hoti dhe Duda Balje.
Nga Lëvizja Vetëvendosje abstenuan Visar Korenica dhe Eman Rrahmani.
Tash e sa muaj, kërkesë e opozitës në Kosovë është t’u mundësohet qytetarëve të tërheqin deri në 30 për qind të mjeteve nga Fondi, për të përballuar, siç thuhet, më lehtë inflacionin në rritje, transmeton Gazeta Metro.
Projektligji që do ta mundësonte këtë, ka dalë në votim në Kuvendin e Kosovës në muajin qershor, por është refuzuar nga partia në pushtet – Lëvizja Vetëvendosje – me arsyetimin se “do të shkatërronte strukturën pensionale të shtetit”.
