Pas ngjarjeve të së martës në veri, ku u sulmuan zyrat dhe zyrtarët e KQZ-së, u krijuan rrethana të reja të cilat sfiduan edhe organizimin e zgjedhjeve për kryetarët e 4 komunave veriore, përcjell InLajmi.
Për zhvillimet e fundit dhe tensionimin e situatës në veri Partia Demokratike e Kosovës reagon ndërsa kërkon krijimin e kushteve për mbajtjen e zgjedhjeve me shtrirjen e pushtetit dhe sovranitetit në atë pjesë.
“Qëndrimi, interesi dhe vullneti ynë si parti opozitare është që në pjesën veriore të Kosovës të mbahen zgjedhjet, siç janë mbajtur vazhdimisht deri sot. Të riaktivizohet plotësisht pushteti i institucioneve tona, të shtrihet gjithandej sovraniteti dhe të gjithë qytetarët, pa dallime, të mos ndihen të pasigurt në vendin ku jetojnë dhe veprojnë.”, thuhet në njoftimin zyrtar të PDK-së.
PDK-ja vlerëson se situata në pjesën veriore të Kosovës ka ndryshuar për të keq, dhe siguria është cenuar.
“Gjithsesi, PDK vlerëson se situata në pjesën veriore të Kosovës ka ndryshuar shumë së fundmi, fatkeqësisht jo për të mirë. Segmentet themelore të jetesës dhe lirisë janë cënuar, me theks të veçantë ai i sigurisë., citohet në njoftimin zyrtyar.
PDK-ja e ka dërguar listën e kandidatëve të saj për kryetar komunash në Mitrovicën e Veriut, për t`ju përgjigjur kërkesës së qeverisë.
“Partia Demokratike e Kosovës i është përgjigjur institucioneve tona për të mbajtur zgjedhje në pjesën veriore të vendit, prandaj, edhe kemi kandiduar duke dërguar listën me kandidatët tanë.”
Partia Demokratike e Kosovës vlerëson se është detyrë e qeverisë që të siguroj dhe garantojë mbarëvajtjen e zgjedhjeve në të gjitha komunat e pjesës veriore të vendit dhe se PDK do të vazhdojë të përgaditet për këto zgjedhje.
“Kjo gjendje për ne është shumë shqetësuese në shumë dimensione. Megjithatë, është obligim dhe detyrë e Qeverisë që të siguroj dhe garantojë mbarëvajtjen e zgjedhjeve në të gjitha komunat e pjesës veriore të vendit. Nisur nga kjo pritshmëri, PDK do të vazhdojë përgatitjet e saj për të marrë pjesë në këto zgjedhje.”
Shtyrja apo anulimi i zgjedhjeve në Mitrovicën e Veriut, sipas PDK-së, do t`i kushtojë Kosovës, sidomos në procesin e dialogut për arritjen e një marrëveshjeje finale.
“Anulimi apo shtyrja e zgjedhjeve në pjesën veriore të Republikës së Kosovës, përveç në aspektin kushtetues, do të jetë problem dhe dështim me shumë pasoja, vështirë të riparueshme, të cilat, pos tjerash, do ta dëmtojnë pozitën tonë edhe në dialogun për arritjen e një marrëveshje finale Kosovë-Serbi!”, thuhet tutje në njoftimin zyrtar.
PDK-ja mendon se pavarësisht deklaratave të ambasadorëve se siguria është në radhë të parë dhe se nuk ka kushte të duhura për zgjedhje, kushtet duhet të krijohen dhe ato të mbahen. /InLajmi/
