Një 4-vjeçar është gjetur i gjallë pasi ka kaluar 6 ditë i humbur në shkretëtirën afrikane i rrethuar nga hienat dhe çakejtë.
Sipas mediave të huaja, djali u gjet i strukur në një grumbull pemësh dhe shkurresh nga piloti, Roan Carr-Hartley.
Ai kishte humbur rreth 18 kilometra nga shtëpia e tij në Asa e vendosur në kufirin verior të parkut Tsavo East në Kenia dhe ishte i mbuluar nga pickimet e mushkonjave dhe jashtëzakonisht i dobët, pasi kishte kaluar gati një javë vetëm pa ushqim.
Parku Kombëtar Tsavo East është një nga parqet më të mëdha në Kenia. Është një zonë e madhe, vendi i një shumëllojshmërie të gjerë të kafshëve të egra, duke përfshirë elefantët, rinocerontët dhe luanët.
Djali ishte zhdukur kur po udhëtonte për në shtëpi gjatë një stuhie me vëllezërit e tij, pas një dite duke kullotur bagëti, tha Carr-Hartley për Newsweek, përcjell Telegrafi.
Ndërsa po ktheheshin përmes stuhisë, 4 vjeçari u nda nga vëllezërit e tij dhe humbi në shkretëtirën afrikane.
Shefi i Asa-s i telefonoi organizatës “Sheldrick Wildlife Trust” për të kërkuar ndihmën e një prej pilotëve të tyre, në mënyrë që ata të mund ta kërkonin djalin nga lart dhe në këmbë.
Grupet e kërkimit arritën ta gjurmonin djalin. Por ndërkohë gjurmët u bënë të pakuptueshme.
Madje, pas disa orësh kërkimesh, nuk kishte ende asnjë shenjë nga djali e nga lart, Carr-Hartley dalloi hienat dhe çakejtë që ecnin në zonë.
“Ishte një mjedis i frikshëm për çdo person të ishte vetëm, e lëre më një fëmijë kaq të vogël”, ka thënë piloti.
Por kishte diçka shpresëdhënëse: kishte rënë shi kohët e fundit, që do të thotë se djali të paktën do të mund të gjente diçka për të pirë.
Dhe 5 ditë pasi humbën, gjurmët e tij u rishfaqën.
Këtë herë ata ishin rreth 14 kilometra larg fshatit të tij.
Carr-Hartley u ngrit përsëri në qiell. Pikërisht atëherë ndodhi një “mrekulli”.
Djali u shfaq i frikësuar nga aeroplani në fillim dhe u përpoq të distancohej. Por ai ishte i dobët dhe e kishte vështirë të ecte.
Pa asnjë mënyrë për të kontaktuar palën e kërkimit nga poshtë, Carr-Hartley qarkulloi në të njëjtin vend për gjysmë ore derisa u shfaqën tre anëtarë të grupit të kërkimit.
Duke e lënë djalin me grupin e kërkimit, piloti bëri udhëtimin e kthimit në fshatin e tij për t’i thënë nënës dhe babait të tij se ai ishte gjetur.
Nëna “u përlot”, e qetësuar.
Djali u kontrollua nga mjekët dhe tani po shërohet mirë.
Prindërit e djemve ia shtuan emrin “Roan” në nderim të pilotit që e gjeti, përcjell Telegrafi.
“Një mënyrë e mrekullueshme për të përkujtuar sagën e tij 6-ditore”, ka thënë piloti.
