Komisioni për Buxhet, Punë dhe Transfere, ka shqyrtuar në parim Projektligjin për lejimin e tërheqjes së mjeteve nga Trusti pensional, pasi kjo çështje u riaktualizua me kërkesë të qytetarëve të cilët përmes peticioneve kishin kërkuar që ky Projektligj të sillet sërish në Kuvend, raporton InLajmi.
Adnan Jashari ishte njëri nga organizatorët, i cili e bëri prezantimin e kësaj nisme, derisa pas prezantimit deputetët paraqitën vërejtjet e tyre lidhur me projektligjin në fjalë.
Deputeti i PDK-së, Mërgim Lushtaku neglizhencën e votimit të këtij projektligji ja atribuon Armend Mujës dhe Kuvendit të Kosovës.
“Unë besoj se është proces i vonuar që 21.000 qytetarë që e kanë kërkuar dhe kanë pyetur se kur do të sillet në Kuvend dhe kjo është neglizhencë e vetë kryetarit, Armend Muja dhe e Kuvendit. Është mirë të largohen inatet politike dhe mendoj se i njëjti duhet të votohet. Besoj se është nismë e drejtë dhe secili deputet besoj se është mirë ta votojë”, tha Lushtaku.
E deputeti tjetër i PDK-së, Bekim Haxhiu foli në cilësinë e të autorizuarit nga organizatorët e peticionit.
“Për pak ditë mbi 21.000 qytetarë kanë kërkuar që ky Projektligj të sillet në Kuvend. Ky projektligj plotëson kushtet formale dhe juridike për ta trajtuar ky Komision. Saktësohet qëllimi që iu mundësohet tërheqja nga 10 % deri në 30 %”, potencoi Haxhiu duke thënë se kriza financiare ka bërë që kjo temë të riaktualizohet sërish.
Tutje, Haxhiu propozoi se personat të cilët kanë kursime pensionale mbi 10.000 euro të kenë mundësi t`i tërheqin 30 % të kursimeve të tyre, kurse ata që kanë mbi 10.000 euro në kursime pensionale të mund t`i tërheqin 25 % ose 10 % të shumës totale.
“Propozohet që personat që kanë deri në 10.000 euro t’i tërheqin deri në 30 %, ndërsa ata që kanë nga 10.000 deri në 20.000 të tërheqin 25 %. Kurse ata që kanë më shumë se 30.000 euro t’i tërheqin deri në 10 %”, tha Haxhiu.
Kjo tërheqje e mjeteve financiare nga Trusti, sipas Haxhiut ndikon pozitivisht në buxhetin e shtetit, sepse qytetarët me ato të holla do të paguajnë TVSH-në, gjithmonë duke llogaritur se atom jete do të shpenzohen brenda Kosovës.
Gjithashtu, deputeti Haxhiu tha se nuk beson se ky projektligj do të vonojë, sepse i ka kaluar të gjitha procedurat e nevojshme.
“Nuk ka kosto shtesë për buxhetin e shtetit por që me këtë do të ndikojë pozitivisht në buxhet sepse tërheqja e tyre do të paguhen TVSH dhe se ato mjete supozohet t’i shpenzojnë brenda vendit. Ky ligj ka kaluar të gjitha proceduat e nevojshme dhe ka një prolongim brenda administratës së Kuvendit dhe besoj se nuk duhet të vonohet më shumë”, shtoi ai.
Qeveria e Kosovës, në vitin 2021 u kishte mundësuar qytetarëve që të bëjnë tërheqjen e mjete financiare nga kursimet pensionale, në vlerë prej 10 % të shumës totale. /InLajmi/
