Ministria e Financave, Punës dhe Transfereve, ditën e martë ka njoftuar se Gjermania është zotuar se do të vazhdoj mbështetjen financiare ndaj Kosovës në vlerë prej 37 milionë euro për periudhën 2022-2023, përcjell InLajmi.
Sipas Ministrisë prioritetet e bashkëpunimit zhvillimor përfshijnë: zhvillimin e qëndrueshëm ekonomik, trajnimin dhe punësimin, ndryshimet klimatike dhe energjinë, tranzicionin e drejtë dhe qeverisjen e mirë.
E kjo mbështetje synon nxitjen e aftësimit profesional dhe arsimor, si dhe krijimin e vendeve të reja të punës si bazë për zhvillimin ekonomik të Kosovës.
Lidhur me këtë mbështetje ambasadori gjerman Rohde u shpreh se me këtë ndihmë ata mbështesim Kosovën në rrugën e saj drejt Bashkimit Evropian.
Ndërsa ministri Murati ka falënderuar të dy delegacionet dhe ka theksuar se Gjermania ka qenë dhe vazhdon të jetë një mbështetëse e vazhdueshme e zhvillimit tonë për më shumë se 20 vjet.
Rikujtojmë se Gjermania është ndër donatorët më të mëdhenj dypalësh në Kosovë, dhe se me angazhimet e reja të ndërmarra, Gjermania dhe Kosova vazhdojnë 23 vjet bashkëpunim të suksesshëm zhvillimor gjermano-kosovar. /InLajmi/
