Drejtuesit e Bashkimit Evropian, liderët e 27 vendeve anëtare si edhe pesë vendet e Ballkanit Perëndimor, u njoftuan sot zyrtarisht nga presidentja e Kosovës, Vjosa Osmani, për një plan të Prishtinës zyrtare.
Në samitin BE-BP në Tiranë, ajo deklaroi se para përfundimit të këtij viti, Kosova do të dorëzojë aplikimin për antarësim në Bashkimin Evropian.
Se një lajm të tillë tashmë e kanë kuptuar, e konfirmoi Charles Michel, president i Këshillit Evropian, i cili në konferencën për media, pas samitit, së bashku me kryeministrin e Shqipërisë, Edi Rama dhe presidenten e Komisionit Evropian, Ursula von der Leyen, tha se për një veprim të tillë, janë njoftuar sot.
“Ky informacion u tha sot nga presidentja e Kosovës”, tha Michel, pasi në lidhje me këtë temë, ai u pyet nga një gazetar i gazetës franceze, ‘Le Monde”.
Ai pyeti se si do të trajtohet një aplikim i tillë, kur pesë vende të Bashkimit Evropian, nuk e njohin pavarësinë e Kosovës.
“I takon Këshillit Evropian ta shikojë se çfarë rruge do t’i jepet kësaj iniciative”, tha shkurt Michel.
Përndryshe, ka përfunduar Samiti mes BE-së, liderëve të 27 vendeve të BE-së dhe atyre të gjashtë vendeve të Ballkanit Perëndimor të mbajtur në Tiranë.
Presidenti i Këshillit Evropian, Charles Michel, deklaroi se duhet të merren vendime shtesë dhe natyrisht të bëhet progres i mëtejshëm.
E kryeministri Edi Rama deklaroi se Michel dhe Urusla von der Leyen, janë luftëtarë të mëdhenj për rajonin e Ballkanit.
Rama tha se pavarësisht vuajtjeve, shqiptarët nuk hoqën dorë asnjëherë nga besimi në BE.
Presidentja e Komisionit Evropian, Ursula vion der Leyen, deklaroi se kryeministri Rama është një mikpritës fantastik.
“Mbështetja jonë për rajonin vjen nga thellësia e zemrës”, tha Von der Leyen, duke shtuar se ky samit ishte i shkëlqyer.
“Kemi miratuar 40 projekte në shifër të madhe dhe ky plan ekonomik po ecën në rrugën e duhur”, tha Von der Leyen.
Presidentja e KE-së deklaroi se është miratuar edhe dhënia e statusit të vendit kandidat për Bosnje e Hercegovinën, pasi të jenë bërë disa hapa paraprakisht nga Sarajeva zyrtare.
Për tregun e përbashkët rajonal, Urusla von der Leyen tha se është e rëndësishme që vendet vetë kanë nënshkruar marrëveshje të tilla.
Sa i përket migracionit, ajo tha se duhet menaxhuar kjo çështje në formë të përbashkët.
Ajo tha se të gjitha vendet e Ballkanit Perëndimor, duhet të jenë në harmoni me rregullat e vizave.
Po vazhdon takimi mes liderëve të BE-së, atyre të 27 vendeve anëtare të BE-së dhe liderëve të gjashtë vendeve të Ballkanit Perëndimor në Tiranë.
Ky takim ka filluar me vonesë për rreth një orë, për shkak të disa vonesave të liderëve evropianë, sikurse presidentit francez, Emanuel Macron, por edhe shfaqjes së një programi artistik të prezantuar nga vendi mikëpritës, Shqipëria.
Mbajtjen e këtij samiti në Tiranë, kryeministri Edi Rama e ka cilësuar si ngjarje historike për Shipërinë.
Kosova në këtë samit të nivelit të lartë, përfaqësohet nga presidentja Vjosa Osmani.
Mes të pranishmëve, është edhe kryeministri i Greqisë, Kyriakos Mitsotakis. Para fillimit të takimit, ai u pyet edhe për dialogun Kosovë-Serbi, meqë ky vend i BE-së është një nga pesë shtetet e unionit që nuk e njeh ende pavarësinë e Kosovës.
I pyetur nga gazetarët edhe për normalizimin e marrëdhënieve Kosovë-Serbi dhe për dialogun mes tyre, kryeministri grek theksoi se të dyja palët nuk duhet të bëjnë hapa prapa.
“Kemi inkurajuar dialogun midis Beogradit dhe Prishtinës që duhet të zhvillohet në mirëbesim”, tha kryeministri grek.
“E kuptojmë kompleksitetin e çështjes, por jemi të vetëdijshëm që kjo çështje të zgjidhet dhe të dyja palët nuk duhet të bëjnë hapa pas”.
Mitsotakis deklaroi se pa u zgjidhur kjo do jetë e vështirë të bëhet progresi i nevojshëm, raporton BE.
Aktualisht liderët kanë hyrë në takim kurse më vonë, do të mbahet konferencë e përbashkët për media e kryeministrit Edi Rama, presidentit të Këshillit Evropian, Cherles Michel si dhe presidentes së Komisionit Evropian, Ursula von der Leyen.
