Deputeti i LDK-së, Avdullah Hoti, i ka komentuar ngjarjet e fundit në Veri, duke i cilësuar si të orkestruara direkt nga Serbia, përcjell InLajmi.
Hoti deklaroi se shumë qytetarë serbë të Kosovës janë duke u keqpërdorur nga Serbia për të krijuar tensione kurdo që i nevojiten Serbisë.
Ai tha se institucionet e sigurisë në Kosovë duhet të përgjigjen me kujdes dhe vendosmëri ndaj veprimeve të dhunshme.
Postimi i plotë i tij:
Veprimet e dhunshme në veri janë të orkestruara nga Serbia. Fatkeqësisht, shumë qytetarë të Kosovës të komunitetit serb vazhdojnë të keqpërdoren nga Serbia për të krijuar tensione në atë pjesë të Kosovës kurdo që i nevojitet Serbisë. Jam i sigurt se ata qytetarët nuk dëshirojnë të jetojnë e t’i rrisin fëmijët në një ambient ku tensionet mund të ngritën kurdo sipas direktivave politike.
Dhuna nuk duhet toleruar, as në veri dhe askund tjetër. Por, institucionet e sigurisë të Kosovës duhet të përgjigjen me kujdes dhe vendosmëri ndaj veprimeve të dhunshme, gjithmonë në koordinim me aleatët që janë të përfshirë në çështjet e sigurisë në Kosovës.
Me veprime të koordinuara duhet të parandalohet tensionimi i gjendjes në atë pjesë të vendit, sepse nuk i konvenon shtetit të Kosovës dhe as komunitetit serb në ato komuna. Një gjendje e tensionuar atje i konvenon vetëm Serbisë./InLajmi/
