Emisari i Bashkimit Evropian Miroslav Lajçak, ditën e martë është takuar me Kryeministrin e Kosovës, Albin Kurtin me ç’rast kanë diskutuar për aktualitetin politik, me theks dialogun sikur edhe zgjedhjet e jashtëzakonshme në 4 komunat veriore, raporton InLajmi.
Pas takimit emisari evropian nuk tha edhe aq shumë, ndërsa theksoi se nuk duhet humbur shumë kohë por duhet të fokusohemi te zgjidhja e problemeve aktuale politike mes 2 vendeve.
Përfaqësuesi i posaçëm i Bashkimit Evropian për dialogun Kosovë-Serbi, Miroslav Lajçak, nuk deshi të fliste afate kohore se kur mund të arrihet një marrëveshje në mes të Kosovës dhe Serbisë.
Lajçak ndër të tjera tha se është shumë me rëndësi që situata është e qetë në Kosovë, ndërsa theksoi se në takim me kryeministrin Kurti është diskutuar edhe për përgatitjen e zgjedhjeve të jashtëzakonshme që pritet të mbahen në 4 komunat veriore.
“Duhet ta shfrytëzojmë këtë momentum dhe jemi duke punuar për takimet në nivel të lartë. Nuk kemi kohë për të humbur. Gjithashtu kemi folur edhe për situatën në veri. Po ashtu edhe për çështjen e energjisë”, ka thënë ai.
Për kthimin e serbëve në institucione, Lajçak ka thënë se e njëjta temë është diskutuar edhe gjatë takimit të tij me presidentin serb, Aleksandër Vuçiq.
“E diskutova dje me Vuçiqin dhe sot ja prezantova Kurtit, se kemi një vakum të sigurisë. Nuk është e mirë për askë, as për njerëzit, shpresoj të kthehen dhe situata të kthehet në normale”.
Lajçak gjithashtu tha se shpreson se marsi i vitit 2023 do ta sjellë marrëveshjen finale mes Kosovës dhe Serbisë. /InLajmi/
