Në inselatorin brenda oborrit të QKUK-së mbledhen afër 2.000 tonelata mbeturina medicinale në ditë. Punëtorët ndihen të rrezikuar, ndërkaq anëtari i komisionit për Shëndetësi, Shemsedin Dreshaj kërkon që çështja e asgjësimit të mbetjeve dhe produkteve medicinale të merret me prioritet.
Me këtë mjet barten dorëza, mantela letre e gjilpëra të përdorura në QKUK, e gjësende tjera të kësaj natyre.
Këto tash e 9 vite mbetjet mblidhen në këtë objekt.
Sasia e mbeturinave medicinale që mblidhen shkon deri në 2.000 tonelata në ditë.
E përgjegjësi i inselatorit, Fadil Berisha thotë se 2 makina që aktualisht janë vetëm për asgjësim nuk janë të mjaftueshme.
‘’Ka pasë nevojë edhe për një me qenë se QKUK-ja është qytet në vete. Kjo ka shumë mbeturina edhe kemi mbeturinat në nivel komune të gjitha qendrat e mjeksisë familjare i bijnë 2 herë në javë”, tha ai.
Më tutje Berisha shton se nga ballafaqimi i përditshëm me këto mbetje ndihet i rrezikuar mirëpo nuk kanë pasur problem deri tani.
‘Të rrezikuar jemi, por deri tani s’keni pasë problem, mirë është’’, tha Berisha.
E anëtari i Komisionit për Shëndetësi, Shemsedin Dreshaj, çështjen e asgjësimit të mbeturinave por edhe të produkteve medicinale e sheh të trajtuar në nivel jo të duhur.
‘’Këto probleme kanë tentuar të zgjidhen deri më sot mirëpo zgjidhja ka qenë çdoherë e pjesshme, ndërsa në strategji, praktikisht është një kaptinë pak e trajtuar, unë mendoj që kjo duhet të merret me një prioritet të madh’’ deklaroi Dreshaj.
Mbeturinat medicinale brenda oborrit të QKUK-së mbledhen çdo ditë, 2 herë brenda ditës në insulator, raporton teve1.info
Ndërkaq pas riciklimit, hudhen në kontejnerë dhe merren nga kompania përgjegjëse për mbledhjen e mbeturinave.
