Kryeministri i Kosovës Albin Kurti, ka shpalosur ndryshimet ligjore të ndërmarra nga Qeveria e Kosovës, në kodin penal dhe atë të procedures penale, përcjell InLajmi.
Kurti tha se ndryshimet ligjore në rastet kur një person shpallet fajtor për veprën penale të dhunës në familje apo asaj seksuale janë këto: Ndalimi i punësimit në institucione publike në pozita në nivel lokal apo qendror, do t’i merret leja e vozitjes, emrat e dhunuesve do të publikohen në faqen zyrtare të KGJK-së, etj.
Ai shtoi se ky ndryshim ligjor për ashpërsimin e dënimeve ndaj dhunuësve do t’u dalin në ndihmë dhe mbrojtje viktimave që kryerësit e këtyre veprave të marrin dënime meritore.
Postimi i plotë i tij:
Protokolli Shtetëror për Trajtimin e Rasteve të Dhunës Seksuale, ndihmë dhe mbrojtje për viktimat
Protokolli Shtetëror për Trajtimin e Rasteve të Dhunës Seksuale, qartëson obligimet e institucioneve përgjegjëse për trajtimin e rasteve të dhunës seksuale.
Nuk mund të lejohen papërgjegjësi të tilla, ku institucionet i hedhin fajet njëra-tjetrës për mosveprim, shmangin përgjegjësitë dhe neglizhojnë viktimat e dhunës kur ato trokasin në dyert e institucioneve. Viktimave u takon përkrahja institucionale dhe shoqërore, përkujdesja maksimale dhe adekuate, shëndetësore e psikologjike.
Organet e rendit e të hetuesisë, prokuroritë dhe gjykatat, duhet të vënë personat e dyshuar sa më parë para drejtësisë. Prokuroritë dhe gjykatat të jenë ato të cilat dëshmojnë se përkushtimi i ri është një fazë e re për të gjitha institucionet dhe për mbarë shoqërinë. Që kryerësit të marrin dënime meritore.
Ndryshimet ligjore të ndërmarra nga Qeveria jonë, në Kodin Penal dhe Kodin e Procedurës Penale, në rastet kur një person shpallet fajtor për veprën penale të dhunës në familje apo të dhunës seksuale, janë këto:
– do t’i ndalohet punësimi në institucionet publike;
– do t’i ndalohet kandidimi në pozita qoftë në nivel lokal apo qendror;
– do t’i merret leja e vozitjes;
– nuk do të zbatohen rrethanat lehtësuese për dhunuesit;
– trajtimi i këtyre lëndëve nuk do të zgjas më shumë se një vit dhe
– emrat e dhunuesve do të publikohen ne faqen zyrtare të KGJK-së.
Andaj, ndryshimet ligjore për ashpërsimin e dënimeve ndaj dhunuesve, si dhe zbatimi i këtij protokolli, do t’u dalin në ndihmë dhe mbrojtje viktimave./InLajmi/
